Unha electoral e reivindicativa inauguración da tan necesaria Casa da Cultura de Cee

09:00 16/03/15

Inauguracion da Casa da Cultura de Cee en marzo 2015

Canta falta facía. A verdade é que toda a comarca de Fisterra necesitaba unha infraestrutura cultural de certa magnitude. E malia que a algún se lle escapase a regla ao marcar a dimensión (tremendamente esaxerada nos tempos que corren), toda a zona seguro que dará uso á Casa da Cultura de Cee e a ese auditorio con aforo para 500 persoas. Tras 18 anos de historia e 3 millóns de €, a CCC era inaugurada o pasado venres, e toda a plana política do PP non faltou á cita. Como para perder unha foto tan sabrosa en plena campaña electoral.

Dirixindo a comitiva política chegaba, escoltada por unha marea de coches policiais, o presidente da Xunta Alberto Núñez Feijoo, a pesar de que o seu goberno apenas realizou dúas achegas no ano 2010 de 150.000€ durante todo o proceso de construción. Tamén estivo Diego Calvo, presidente dunha Deputación, unha entidade que si que sufragou boa parte dos fondos necesarios dende o primeiro ata o último día.

Durante a inauguración, non houbo tempo para que falase algún activo cultural do Concello, (se ben si que actuaron a Banda de Música de Cee e a Coral Polifónica Neria de Cee), pero si para que o cura bendecise o edificio.

Despliegue policial para a inauguracion da CCC-Foto-Manu

De benvida, manifestación

Manifestacion pola Autovia Costa da Morte ante a CCC-Foto-Manu 2

E ademais de cultura, tocaba falar de infraestruturas, pero de comunicación. E para recordarllo, máis dun centenar de veciños recibírono con pancartas, convocados polo activo Foro Costa da Morte, e tamén polo BNG comarcal, que critica duramente o aproveitamento electoral. E o fixeron para pedir que a necesaria vía chegue ata Cee, unha vez que o polémico novo contrato da Autovía supón a anulación do treito sur.
Aló estaban moitos veciños cabreados a título persoal, membros do BNG ou da CIG ou mesmo do comité de empresa de Ferroatlántica, entonando cánticos como “Onde están, non se ven, os postos de traballo do PP”, ou “Menos propaganda, máis postos de traballo”.

De prazos na Autovía

Anunciaba Feijoo, coma se fose novidade, que os 27 km do treito norte da Autovía entre Carballo e Baio estará en servizo en 2016, algo que xa sabemos dende hai case 6 meses. E algo que sorprendeu foi á posible posta en servizo dunha circunvalación de Cee e ao porto comercial de Brens.

A verdadeira inauguración

Foi o sábado, e con cultura de verdade, cando a Casa da Cultura de Cee quedou verdadeiramente inaugurada. E foron, por obrigación, os membros da compañía local Talía Teatro os encargados de estrear o auditorio, e dicir as primeiras verbas dende o escenario. Os Toño Casais, Arturi Trillo, Dani Trillo e María Ordróñez, si que abriron o telón por primeira vez.

Ademais, a cita dominical foi tremendamente emotiva. No marco do programa cultural trimestral, eran os propios veciños os protagonistas. Aló subiron ao escenario as xentes de Terra de Sena de Cee, de Fumes do Cal de Ameixenda, da SCD de Brens, das Pedras Miúdas de Lires, e cos Grupos de Pandeireteiras de Pereiriña, Gures, Toba, Brens e do Cenntro Social, ademais do grupo Petaforte da Pereiriña.

Así, ademais da Biblioteca, a pleno rendemento dende o pasado mes, a instalacións acollen na sala de exposicións a mostra do XI Premio de Creación Fotográfica Luís Ksado da Deputación. E a pesar de todo, nós pedimos unha Longa vida a esta, tan necesaria, infraestrutura cultural comarcal.