Cun orzamento de 980.000 euros, a Deputación da Coruña subvencionará a contratación de persoal técnico deportivo nos concellos durante o 2018. Esta liña de axudas, que convoca anualmente a institución provincial, está dirixida a todos os concellos e entidades locais da provincia. Durante o ano 2017, un total de 75 concellos coruñeses contrataron a un técnico de deportes co apoio da institución provincial. As axudas destínanse a custear as nóminas, a seguridade social e os contratos de servizos, cun importe máximo de 15.000 euros para cada municipio. Os concellos poderán contratar a graduados universitarios en Ciencias da Actividade Física e o Deporte ou a técnicos superiores en Animación de Actividades Físicas e Deportivas. O deputado responsable da área de Deportes, José García Liñares, destacou que “con este programa perséguense dous obxectivo”. Por unha banda, “contribuír á creación de postos de traballo na provincia”, facilitando que os concellos contraten persoal cualificado, e por outra, “fomentar a práctica de actividades deportivas”, especialmente entre a mocidade e as persoas maiores. Asemade, a liña de axudas da Deputación permitirá desenvolver programacións deportivas estables e homoxéneas, durante todo o ano e en todos os concellos da provincia, independentemente do seu tamaño. Os concellos interesados en concorrer a estas subvencións poden presentar as súas solicitudes ata o día 15 de febreiro, ás 14:00 horas. Novas relacionadas

• 2016: Todos os Concellos da bisbarra agás Coristanco reciben axudas da Deputación para os técnicos deportivos

Fonte

• Redacción QPC ([email protected])
• Deputación da Coruña