A federación de Anpas Costa da Morte prepesenta o seu catálogo de intencións ao BNG
09:17 22/07/15
A federación de Anpas Costa da Morte e representantes do Bloque Nacionalista Galego da bisbarra mantiveron recentemente unha reunión na que se expuso un catálogo de intencións
Dende a federación de Anpas Costa da Morte consideran que "os concellos teñen nas súas mans a administracion máis achegada á realidade cotiá e tamén teñen o potencial de traballar coas outras administracións públicas para axilizar a relación da cidadanía con institucións moitas veces arredadas ou dificilmente accesíbeis", segundo un comunicado remitido á redacción de QPC.
Como nais e pais de nenas e nenos do Ensino Público, de educación infantil, primaria e secundaria, dende a federación de Anpas Costa da Morte entenden que a formación integral, humana e académica, da infancia e a xuventude debe ser o obxectivo principal da administración pública e nomeadamente dos concellos. Tanto desde o punto de vista da competencia propia como dende a perspectiva de intermediarios diante da administración autonómica, a educación debe ser prioritaria nos seus obxectivos, por ser a base dunha sociedade xusta e igualitaria.
Resposta positiva
Pola súa banda, os representantes do BNG da Costa da Morte e Xallas din que "gobernamos e participamos en gobernos municipais que defenden o Ensino Público, que poñen ao seu servizo os seus recursos e esforzos. Entendemos o ensino como un instrumento esencial ao servizo dunha sociedade galega democrática, igualitaria, inclusiva e participativa, en definitiva dunha sociedade mellor para todos e todas".
Novas relacionadas
- As ANPAs da Costa da Morte esixen atender as necesidades do alumnado NEAE
- 16-06-15: Nenos e pais maniféstanse contra a Lomce e para pedir a graituidade dos libros e do material escolar.
Fonte
- Redacción de QPC ([email protected]).
- Fedanpas.