A plataforma do sector lácteo anuncia novas protestas a partir do día 23

07:08 17/11/15

No verán houbo multitudinarias manifestacións do sector lacteo en Compostela. Foto: Javier Gonzalez Despois de tantas mobilizacións, semella que a crise do sector lácteo pouco se arreglou. Así o asegura a Plataforma pola Defensa do Sector Lácteo Galego quen mostrou onte, a través dunha nota de prensa, o seu desacordo unánime contra a actitude da conselleira de Medio Rural, por non telos recibido, “especialmente cando recibe a colectivos menos representativos no sector lácteo”. Por elo, solicitan unha entrevista urxente, “que de non efectuarse, -advirten-, levarán a cabo accións para que esa entrevista teña lugar”. Poñen como data de referencia o 23 de novembro, cando se cumpren 2 meses da sinatura do acordo de Madrid. Na citada xuntanza, os membros da Plataforma pola Defensa do Sector Lácteo Galego trasladaranlle as súas súas preocupacións:

Non existe a comisión de seguimento e xa solicitaramos unha en Galicia.
Non acaban de publicar o decreto de cesión de prezos da industria á distribución nin o novo modelo de contrato.
A subida dos prezos ao consumidor nos lineais non repercute en beneficio ao gandeiro.
A industria segue a presentar contratos á baixa.
Non é certo que os prezos se estean a recuperar.

Diante desta situación, a Plataforma decidiu, nunha xuntanza celebrada este venres 13 de novembro en Santiago, darse un prazo dunha semana para decidir medidas concretas de presión para que a Administración axilice o cumprimento do acordo, para que a industria deixe de presentar contratos á baixa e comece a presentar contratos axeitados ao estudo da cadea de valor do INLAC e para que a distribución traslade o incremento de prezos ao consumidor á industria, para que esta mellore os prezos aos gandeiros. Tamén matizan que “as axudas non solucionan nada a situación do sector e as subvencións son exclusivamente para adquirir medios de traballo e no fondo acaban en mans dos provedores de maquinaria e equipamento, normalmente estranxeiros e ao gandeiro quédalle tan só o seu traballo e un crédito no banco”. Dende a Plataforma queren deixar claro que “os gandeiros non somos uns perceptores de axudas, como parece que algún sectores pretenden deixar ver, manipulando a realidade interesadamente e o modelo baseado nas subvencións son pan para hoxe e fame para mañá. O que defendemos é un marco que permita unhas relacións estables no tempo, garantido por unha Administración comprometida”.