Pleno da Deputación do pasado venres As cifras do Plan Único da Deputación (a unión feita en 2017 dos antigos POS, PAS e PAI con varias liñas de subvención anuais)  son bastante claras. Case 50 millóns deixa a entidade provincial con este programa nos 18 concellos da Costa da Morte nas tres anualidades 2017, 2018 e 2019. Serán máis de 12 os millóns que caian o vindeiro 2019, con este Plan que permite aos Concellos ser máis autónomos para planificar con maior tempo e con maior independencia os seus investimentos máis necesarios, ademais de facilitar unha maior axilidade na tramitación

O pleno da Deputación da Coruña aprobaba o pasado venres o orzamento de, inicialmente 61,5 millóns, cos votos favorables de PSdeG-PSOE, BNG, Marea Atlántica, Compostela Aberta e Alternativa dos Veciños e abstención do PP.

O orzamento irá medrando en función dos remanentes, se ben os 93 concellos da provincia teñen de prazo dende o 15 de outubro ata o 20 de decembro para solicitar á Deputación os proxectos que queren financiar con cargo ao POS+2019. Un dos valedores deste Plan no ente provincial é o deputado carballés, Xosé Regueira, responsable da área de Plans e Cooperación cos Concellos, que destacou durante o pleno que o programa “demostrou ser un instrumento útil” para que os concellos afronten as súas necesidades concretas e que “mellorou e simplificou as relacións entre os concellos e a Deputación”.  “Todos os alcaldes da provincia, de todas as cores políticas, transmítenos claramente a eficacia do Plan Único”, afirmou, que considerou que este sistema “debe ser o camiño” tamén para outras administracións públicas xa que ofrece total transparencia na asignación de fondos e permite total autonomía municipal para decidir en qué investir en cada concello.

PLAN ÚNICO 2019 na Costa da Morte

CONCELLO	Achega inicial 2019	TOTAL 2017 - 2019
Cabana	614.734,57	2.365.526,75
Camariñas	496.431.47	1.796.785,22
Carballo	1.585.286,57	6.565.925,19
Carnota	429.141,14	1.786.636,08
Cee	511.983,92	2.098.664,41
Corcubión	195.054,88	737.272,66
Coristanco	1.023.521,00	3.428.463,23
Dumbría	568.127,53	2.363.141,91
Fisterra	333.418,32	1.349.803,37
Laxe	353.182,50	1.373.196,05
Malpica	517.227,35	2.026.153,34
Mazaricos	812.304,85	3.322.126,37
Muros	691.640,60	2.546.685,00
Muxía	699.458,83	2.781.486,69
Ponteceso	690.237,03	2.614.198,79
Santa Comba	1.026.951,21	4.273.465,18
Vimianzo	876.406,54	3.721.334,24
Zas	716.749,67	2.947.216,63
TOTAL	12.141.857,98	48.098.081,11