A Pipa: Derbi comarcal, triunfo local
08:52 13/11/18
Imaxe do Baio-Fisterra-Foto-CD Baio
Xornada de derbis na competición da Costa, tanto en 1ª Autonómica como, moi especial, en 3ª, onde por primeira vez na historia enfrontábanse Camariñas e As Baleas, cun resultado moi amplo a favor dos históricos ante os noveles.
Liga da Costa
Na Liga da Costa, mantense púgnaa na cabeza da clasificación, cun Mazaricos que se reafirma no liderato e un Corme que segue o seu ronsel. O Mazaricos aproveitouse do momento complicado do Buño, onde presentou a súa renuncia a seguir como adestrador Chema Rivadulla, e os pupilos de Roberto Amoedo non deron opción aos locais, endosándolle un rotundo 0-7, sentenciando o encontro xa na primeira metade, sen máis historia. Sorprendeu o amplo triunfo do Corme ante un conxunto liquide defensivamente como o é o Cerqueda de Raúl Periscal, pero os azuis, cun Alejo que suma e segue, non deron opción aos brancos, endosándolle un 4-0 que deixou clara a diferenza existente sobre o terreo de xogo. Sufriu, e moito, o Ponteceso para sumar un importante triunfo no Pinguel ante un Muros que lles puxo as cousas moi complicadas. Un tanto de Matías, que na segunda metade sería expulsado, significou a vitoria para os locais, que se manteñen na terceira praza en pos dos postos de privilexio. Tampouco cedeu o Muxía, que venceu e convenceu ante un Lira que segue sen sumar e tres en tres e cada vez vaise máis afastado dos postos de permanencia. Os xogadores de Adrián Lema seguen desenvolvendo un bo fútbol e encandeando aos seus afeccionados e, sobre todo, mostrando unha firmeza absoluta na faceta defensiva, con tres tantos encaixados nas nove xornadas disputadas. Deu boa conta o Volantes do Malpica en Muros, onde os homes de Sil fanse cada vez máis fortes, levantándose á zona nobre e superando na táboa a un Malpica que viña a un bo nivel pero que viu como os laranxas, nun excelente encontro, endosábanlle un rotundo 4-1. Tamén volveu á boa senda o Baiñas, que se mantén na quinta praza da clasificación, e nun choque accidentado polas lesións de xogadores verdes, soubo sacar adiante o compromiso cun 3-0 ante un Ameixenda que volve caer en posicións de descenso, empatado a puntos co Muros. Golpe sobre a mesa do San Lorenzo en Louro, superando a un once local que o intentou todo, chegando a colocar o 1-1 momentáneo no marcador, pero ao final dos noventa minutos o conxunto preparado prol Pablo Mallón levouse os tres puntos de Agra da Filgueira cun 1-2 que lles afasta en catro puntos do seu rival. En Cee, un tempo para cada equipo e reparto de puntos entre o Unión e o Sporting Zas. Adiantáronse os locais moi pronto, empatando ao comezo da segunda metade os visitantes. Partido accidentado, con tres lesionados no Sporting e máis importante a lesión do meta do Cee, Maikel, con fractura no nariz. Para a próxima xornada, o líder será anfitrión en Piñeiro do Val ante o Cee; o Corme renderá visita ao farolillo vermello, Lira; miniderby en Cerqueda, coa visita do Ponteceso e o cuarto, Muxía, viaxará a Cee para enfrontarse ao Ameixenda. A Zas chegará un Baíñas en bo momento, mentres que o Malpica enfrontarase no derbi ao Buño na Pedra Queimada. Bo partido en Verdillo, onde os locais recibirán ao Volantes. E derbi en Muros, onde o once celeste será anfitrión do Monte Louro, separados por un punto na táboa clasificatoria.3ª Galega
Un partido chamaba a atención no pasado fin de semana, o que enfrontaba en Castriz aos dous primeiros clasificados. E o Coristanco lograba sumar os tres puntos en xogo, desbancando aos pupilos de David Velo do liderato e asumindo a primeira praza. Ademais, son o único conxunto invicto logo de nove xornadas disputadas. O outro foco de atención estaba en Camariñas, onde o histórico conxunto local recibía ao novel As Baleas, no derbi local, e os pupilos de Ton non deron opción aos visitantes, endosándolle un rotundo 10-0 ante máis de cincocentos afeccionados nas gradas do Hermanas Patiño. Importante triunfo do Cabana na Serra de Outes, ante un once local que non termina de arrincar e que segue fóra da zona de promoción de ascenso, aínda que a dous puntos do sexto, pero xa a sete dos cinco primeiros. O Cabana aproveitouse das súas ocasións e soubo sumar os tres puntos en xogo que lle manteñen na zona de pódium, a un punto do segundo e cun encontro menos disputado. En Corcubión, o Porteño de Varela vencía por 0-3 e mantense nesa pugna pola zona de play-off de ascenso, deixando aos locais como farolillos vermellos da competición e sen sumar ningún triunfo logo de oito xornadas disputadas. Laxe e Castrelo seguen a súa marcha cara á zona de play-off, especialmente os de Vimianzo, que están realizando unha excelente campaña e son quintos a dous puntos da segunda praza e nesta xornada venceron e convenceron por 4-2 a un Nantón que non termina de arrincar. O Laxe, pola súa banda, non pasou por grandes apuros ante o Seaia, ao que derrotou en Malpica por 0-2, situándose empatado a puntos co Camelle na loita polo play-off de ascenso. Na próxima xornada, partido importante en Coristanco, onde o líder medirase ao Castrelo. Complicada saída do Castriz a Camelle e do Camariñas a Nantón. O Laxe é favorito no seu compromiso co Corcubión, do mesmo xeito que o Cabana ante o Seaia. Non pode fallar o Outes fronte ao As Baleas. Descansa nesta xornada o Porteño.Preferente
Dobre derrota pola mínima dos conxuntos costeros nesta xornada de Preferente. O Xallas visitaba o terreo do sólido líder da clasificación, As Pontes, e vendeu cara a súa derrota, poñendo contra as cordas aos locais. Prol un solitario tanto do As Pontes, supuxo a derrota dos xalleiros, pese aos intentos visitantes de alcanzar un mellor resultado. En Ordenes, o Sofán mereceu moito mellor resultado que o 2-1 que quedou no marcador ao término dos noventa minutos de xogo. Os verdes adiantáronse na primeira metade, empatando o conxunto preparado por Iván Cancela xa nos segundos corenta e cinco minutos, pero un gol postrero dos locais significou a derrota final dos sofanistas. Este fin de semana, o Xallas medirase na Fontenla a un San Tirso que se atopa un posto e un punto por encima dos verdes na táboa clasificatoria, mentres que o Sofán, no Carral, medirá as súas forzas co Foz, decimosexto clasificado a sete puntos dos locais.1ª Galega
Dobre derbi entre equipos da Costa na última xornada, saldados con senllos triunfos dos equipos locais. En Dumbría, o once dirixido por Julián soubo nadar e gardar a roupa para facerse co triunfo ante o Soneira por 3-1, que deixa aos locais en metade da táboa, con 16 puntos, mentres que os de Vimianzo caen a zona de descenso directo, con 10 puntos, aínda que empatados a puntos con Bastavales e Chaián. Pola súa banda, o Baio volveu demostrar o seu bo momento de xogo e venceu e convenceu ante o Fisterra, que chegaba cunha racha de xogo e resultados excelente, pero que se viu superado por un conxunto que, con MC nuevamente en plan goleador, endosáballe un inesperado 4-0 polo amplo do mesmo. Os branquiazuis colócanse na cuarta praza, empatados a puntos cos fisterráns e a un punto do segundo posto, que agora pasas a mans do Flavia. Non tivo fortuna a Esteirana en Bertamiráns, onde os azulgrana non estiveron nada atinados e víronse claramente superados por un once local que lles adianta na clasificación e déixalles no farolillo vermello da táboa, con 6 puntos. Os pupilos de Geno non atoparon o seu sitito en ningún instante no reducido recinto do Bertamirans e o 3-1 final deixou os puntos no casillero local. Na xornada do próximo fin de semana, o Fisterra ten un duelo nas alturas co líder intratable da clasificación, Sigüeiro, do que lle separan sete puntos na táboa, mentres que o Baio renderá visita ao segundo clasificado, Flavia. Os catro primeiros fronte a fronte nunha boa oportunidade de reducir distancias para os equipos da Costa. O Soneira recibirá no Municipal a un Escravitude que marcha en metade da táboa, con 17 puntos, mentres que o Dumbría rende visita a un Tordoia do que lle separan tres puntos e marcha quinto na clasificación. Non o terá fácil a Esteirana no José Luís Vara, onde chega o sexto clasificado, Piloño, coa necesidade local de sumar un triunfo que corte o seu racha de resultados adversos.- Manuel Corredoira, Entrenador UEFA PRO, Nacional Nivel 3 de Fútbol e Director Deportivo pola RFEF, formador da Escola Galega de Adestradores, actual coordinador das Escolas de Fútbol Base de Zas e Delegado da Federación Galega de Fútbol para a Costa.
