Eduardo Parga e Miguel Fernández asinando o contrato das rúas malpicás co responsable de Construcciones Vázquez y Reino

Construcciones Vázquez y Reino será a encargada de executar das obras de reforma integral da Travesía Emilio González López e das rúas Garda Civil J. A. Pardines e Doutor Fleming, dous proxectos nos que investirá 21.840,50 e 67.881 euros, respectivamente, con cargo ao POS+ 2017. O obxectivo das dúas actuacións é dobre: por unha banda, a mellora dos servizos urbanísticos, que son antigos e están deteriorados, e, por outra, a mellora da accesibilidade e do aspecto xeral das rúas, todas elas moi céntricas, mediante a renovación integral de firmes e pavimentos. Na Travesía Emilio González López o principal problema radica na inexistencia de rede separativa de augas pluviais e residuais, polo que se producen rebordamentos nalgúns baixos, e ademais a rede de abastecemento de auga é obsoleta. Para solucionar esas deficiencias e acometer o novo tratamento en superficie establécese un prazo de execución de dous meses. Os mesmos problemas cos servizos urbanísticos repítense nas rúas Garda Civil J. A. Pardines e Doutor Fleming, dúas vías curtas, de 46 metros de lonxitude, e estreitas (4,50 e 3,25 metros de ancho, respectivamente), que están situadas no centro urbano e son moi transitadas, sobre todo no verán, xa que conectan a rúa principal co paseo marítimo e a praia. O tránsito é fundamentalmente peonil, e só circulan os vehículos de residentes, reparto de mercadorías, limpeza e recollida de residuos sólidos urbanos. Neste caso o prazo de execución é de catro meses.

Fonte

Concello de Malpica.