Os murais do Pintar na Rúa de Malpica renderon homenaxe aos sectores produtivos
08:16 06/09/18
Concelleira e alcalde visitaron o mural do Pintar na Rúa
Rematou unha das accións culturais máis simbólicas do verán malpicán. O programa Pintar na rúa, a través do que os máis pequenos embelecen a degradada contorna urbana convertindo os muros en lenzos, rematou estes días. A artista carballesa Emi de las Heras vén de rematar o novo mural do parque infantil da rúa Patria Galega, en cuxa elaboración participaron preto de 40 nenos e nenas.
Unha edición na que se rendeu homenaxe aos sectores produtivos da vila, como son a pesca, o traballo das redeiras e a olería son os principais protagonistas do novo mural que enche de cor a parede do parque infantil de Malpica.
A quinta edición de Pintar na Rúa, un proxecto que ten coma finalidade o tratamento artístico de espazos degradados en décadas pasadas, continúa transformando a vila malpicá e implicando aos nenos e nenas nese proceso de transformación.
Nas edicións anteriores, os/as participantes pintaron nos muros exteriores do Centro Cívico, no paseo marítimo e no parque infantil, aínda que o último mural foi vítima do vandalismo e por iso este verán volveu a escollerse o mesmo lugar. Artistas coma Paula Fraile, Roberta Venanzi, Laura Tova, e este ano Emi de las Heras, teñen deixado as súas pegadas na nosa vila.