Os portos de titularidade da Xunta recibiron durante este 2016 un total de 8.167 embarcacións náutico recreativas en tránsito, un aumento do 4% con respecto ao ano pasado. Deles, 1460 pararon nos portos costeiros de Muros, Muxía e Camariñas. O porto muradán é o porto autonómico con maior rexistro, con 686 visitas, por diante de A Pobra (500), ou Ribadeo (458).

Foron 328 barcos os que pernoctaron en Muxía e 446 en Camariñas, o 5º posicionado en número de barcos.

A captación de novos tránsitos é unha liña de traballo estrutural da Consellería do Mar, tal como se recolle no Plan Estratéxico da Náutica Recreativa 2012-2020, que Portos de Galicia está levando a cabo. Para impulsar estas chegadas, estanse a desenvolver accións promocionais dos portos deportivos de Galicia a nivel nacional e internacional. Así, cómpre reseñar a participación da Consellería do Mar, en colaboración con Turismo de Galicia, en eventos de referencia no sector do turismo náutico, como o Salón Náutico Internacional Grand Pavois, de La Rochelle, ou o Salón Náutico de París e proximamente os de Dusseldorf, Dublín e Southampton.

Novas relacionadas

• Setembro 2016: O porto deportivo de Muros, entre os máis visitados de Galicia.
• O Náutico de Camariñas únese á prestixiosa rede internacional de Portos Deportivos Passeport Escales.
• O Porto Deportivo de Muxía, presente no Salón Náutico de La Rochelle.

Fonte

• Redacción de QPC ([email protected]).