O PP critica que a “desidia” do goberno local que deixa a Muxía sen Obradoiros de Emprego
Imaxe dun dos Obradoiros de Emprego levados no Concello de Dumbría
Dumbría, Santa Comba, Mazaricos, Carnota, Muros, Carballo… son Concellos da Comarca que teñen acollido Obradoiros de Emprego nestes últimos anos. Entre eles non atopamos ao Concello de Muxía, empantanado na “desidia” e “desinterese” do seu goberno local, como denuncia a voceira do PP, Sandra Vilela.
O grupo opositor lembra que o desemprego é un dos maiores problemas do municipio e lamenta a “nula preocupación” mostrada polo rexedor, Félix Porto, para terminar co esta carencia. Sandra Vilela subliña que concellos como Dumbría, da misma cor política, si toman parte desta iniciativa, e por iso “resúltanos complicado poder atopar un motivo que xustifique que Muxía non participe na solicitude deste obradoiro de emprego. Só se nos ocorren dúas posibilidades, ou que o executivo local non se decata destas cousas, que sería grave, ou que as coñeza e non lle interese poñelas ao alcance dos veciños, que sería aínda moito peor”, indicou Vilela.
Vai máis alá Vilela asegurando que “Desde o Partido Popular sempre criticamos a política laboral do Concello. Non entendemos que a política laboral sexa dar un mes de traballo porque sabemos que este mecanismo non deixa de ser unha forma de vender un favor para lembralo o día das eleccións”.
