Venres. 29.03.2024
El tiempo

Últimos días para que os grupos inscriban os seus espectáculos na Rede Cultural

Últimos días para que os grupos inscriban os seus espectáculos na Rede Cultural
Rede CUltural da Deputacion Coruna

Últimos días (ata o 17 de xaneiro) para que as compañías de todo o país (este ano a gran novidade é precisamente a apertura a compañías de toda Galicia) inscriban os seus espectáculos na Rede Cultural da Deputación da Coruña. O circuito, que pasa por ser o maior distribuidor de cultura que temos, conta cun orzamento de 2 millóns de euros, e pretende superar as cifras do ano pasado: levou uns 2000 espectáculos por todo o país, deles arredor de 350 á nosa bisbarra.

Todas as compañías de teatro e danza, grupos musicais e empresas audiovisuais da cultura galega poden pois inscribir os seus espectáculos nos catro programas, "Escena ao vivo", "Visións", "Alicerce" e "Lingua a escena!". "A aposta pola Rede Cultural supón apoiar programación cultural de calidade en todos os concellos e materializar o noso lema de "A Cultura é un dereito", destaca a vicepresidenta e responsábel da Área de Cultura da Deputación da Coruña, Goretti Sanmartín Rei para quen o programa supón tamén unha importante contribución á difusión da produción cultural e á consolidación do sector coa creación de emprego.

A Rede da Deputación da Coruña artéllase en catro programas con identidade propia: "Escena ao Vivo!" que acolle espectáculos teatro, monicreques, maxia, danza e música de compañías e artistas profesionais; o programa "Visións" de cinema e contidos audiovisuais tamén de categoría profesional para concellos; "Alicerce", para a categoría non profesional e, de nova creación, "Lingua á escena!" destinado á promoción do galego a través da cultura con espectáculos específicos orientados á dinamización social da nosa lingua nas programacións dos concellos.

Unha vez rematado o prazo de inscrición de espectáculos, os Concellos e asociacións poderán solicitalos para os seus eventos ou festas. A Deputación achega o 75% do orzamento para concellos de menos de 5.000 habitantes, o 60% para os que van dos 5.000 a 10.000 habitantes, 50% para os que contan cunha poboación de entre 10.000 e 20.000 habitantes, un 40% para os que van de 10 a 50.000 e un 30% aos que superan os 50.000 habitantes. Para entidades, a Deputación achega o 70% do orzamento das actuacións do programa "Alicerce”.

Novas relacionadas

https://quepasanacosta.gal/aberto-ata-o-17-de-xaneiro-o-prazo-de-inscricion-de-espectaculos-a-rede-cultural-da-deputacion/

Comentarios