Luns. 27.01.2020
El tiempo

Ponteceso pon en marcha outro ano máis os Campamentos de Nadal

Ponteceso pon en marcha outro ano máis os Campamentos de Nadal

Chegan as vacacións escolares de Nadal e con elas un novo crebacabezas para moitos pais e nais con fillos en idade escolar. É por isto que o Concello de Ponteceso volve a poñer en marcha os tradicionais Campamentos de Nadal a través do programa Respira que promove a Concellería de Servizos Sociais. Este ano, como novidade,  os nenos e nenas contarán con máis días de diversión  e actividade, 8 en total, e os pais disporán de conciliación o día de Noiteboa e o de Fin de Ano.

Ademais de axudar a compaxinar traballo e familia,  ofrecerá un amplo programa de actividades, repleto de divertidas e interesantes propostas educativas baseadas no xogo e na aprendizaxe. Obradoiros de artes plásticas, teatro, contacontos, xogos pre-deportivos e un feixe de sorpresas máis completarán a oferta lúdica coa que poremos a proba o enxeño, a creatividade e a imaxinación dos máis cativos.

Os campamentos, dirixidos a nenos de 4 a 12 anos de idade, desenvolveranse os días 23, 24, 26, 27, 30 e 31 de decembro e o 2 e 3 de xaneiro no Edificio das Escolas de Ponteceso e no pavillón municipal de Corme. No primeiro caso, o horario das actividades será de 10:00 a 13:00 horas, mentres que no segundo comprenderá de 10:30 a 13:30 horas.

As familias interesadas en participar neste programa, totalmente gratuíto, deberán inscribirse no departamento de Educación Familiar de Ponteceso (881 983 223) e/ou na Oficina Municipal de Corme (981 738 428) en horario de 9 a 14 h. O prazo para anotarse permanecerá aberto do luns 16 ao xoves 19, ambos incluídos. Dado que as prazas son limitadas, a adxudicación realizarase por rigorosa orde de inscrición e será preciso achegar acreditación da necesidade de conciliar vida familiar, laboral e persoal.

Comentarios