Suso Lista presentou na casa os contos verdadeiros de Charamuscas
08:12 29/05/17
Suso Lista presentando na Solaina de Corme o novo libro Charamuscas-Foto-Gin Vidal
Arroupado pola súa xente, o bo de Suso Lista presentaba este pasado sábado 27 de maio o seu novo libro “Charamuscas”, que completa a súa triloxía de relatos curtos. Ao pé da Solaina cormelá Suso presentou a súa nova obra xunto co editor de Embora Miguel Toval e Xosé Manuel Varela, o responsable da revisión lingüística.
Suso, xa todo un autor cunha voz definida e recoñecible, foi debullando as historias salgadas polas que transcorre o libro, que vai dende o mesmo porto cormelá por toda a costa galega de Ribadeo a Baiona, e atraca en lugares tan dispares como Mojacar. Desta volta, Corme, sen citalo, está no fondo de todos os seu relatos.
Un libro cheo de historias auténticas, cunha linguaxe tan humana, tan real, que nos fai mollarnos de mar. “Só as mans verdadeiras escriben contos verdadeiros”, que escribe Manuel Rivas no prólogo
Editado por Embora, “Charamuscas” xa está nas librarías e tamén na web de Edicións Embora para encargar. E agora, despois desta triloxía de relatos, parece que a Suso tócalle tomarlle o pulso ao que podería ser a súa primeira novela. Estaremos atentos!
Novas relacionadas
- Maio 2017: Suso Lista completa a súa triloxía de relatos con Charamuscas.
- Xuño 2015: Suso Lista publica o seu segundo libro, Xeixos, con sabor ao mar salgado de Corme.
- Suso Lista, terceiro Mellor Autor do Ano para a revista Fervenzas Literarias.
- Suso Lista e Suso Bahamonde seguen expandindo os seus libros.
- Dous Susos, dous libros.
- Maio 2014: Suso Lista presenta na casa o seu libro Salseiros.
Fonte
- Redacción de QPC ([email protected]).