Condenan a 13 anos de prisión ao home que intentou asasinar á súa exparella en Vimianzo
Era maio de 2019 cando un intento de asasinato machista provocaba unha tremenda consternación en toda a comarca.
Dous anos despois, a sección primeira da Audiencia Provincial da Coruña vén de condenar a 13 anos de cárcere ao autor, ademais de 7 anos de liberdade vixiada e a prohibición de comunicarse por calquera medio coa vítima e de aproximarse a ela durante 15 anos, así como a prohibición, durante o mesmo período, de residir no mesmo termo municipal que á súa excompañeira sentimental.
Os xuíces, que tiveron en conta a agravante de discriminación por razón de xénero, tamén lle impuxeron o pago dunha indemnización de 30.500 euros polo dano moral e as lesións e secuelas que lle quedaron á súa exmoza.
A Audiencia relata na sentenza que o sospeitoso e a vítima mantiveron unha relación sen convivencia desde 2017 ata o mes de febreiro de 2019, cando terminou, a pesar de que o condenado seguía insistindo en retomala. O 15 de maio dese ano, sobre as 9.10 horas, “coa intención de acabar coa vida” da súa excompañeira sentimental, accedeu ao lugar onde traballaba armado cun coitelo de cociña oculto entre as súas roupas. Os maxistrados destacan que escolleu esa hora porque sabía que as oficinas “se atoparían, con toda probabilidade, sen afluencia de xente, polo que lle sería máis difícil pedir axuda, pois, ademais, era a única empregada presente”. Ademais, portaba unha maleta propiedade da vítima, a cal se comprometeu a devolverlle o día anterior, evitando, con iso, que puidese desconfiar da súa presenza nas oficinas.
Unha vez dentro, segundo relatan os xuíces, “de forma sorpresiva, empuxouna coa maleta para, acto seguido, agarrala polo pescozo e cabelos, conseguindo así lanzala ao chan e colocarse enriba dela”. Nese momento, “comezou a lanzar diversas coiteladas ao pescozo da súa exparella, alcanzándoa na zona cervical, concretamente na zona da vea xugular, logrando, nalgunha ocasión, a vítima parar algunha das coiteladas coas súas mans”. Finalmente, o acusado foi sorprendido por unha muller que accedeu á oficina. “Ante o inesperado da súa presenza, reaccionou levantándose momentaneamente e dicíndolle que se marchase, o que permitiu á vítima pedirlle a esa muller que chamase á Garda Civil, zafarse do acusado e irse ata o exterior”.
Axentes da Garda Civil presentáronse no lugar dos feitos en escasos segundos e taponaron as feridas que a afectada tiña no pescozo, á vez que reclamaron a presenza urxente dos servizos sanitarios, os cales evacuaron rapidamente á muller en helicóptero a un centro sanitario de Santiago de Compostela. “Foi só debido a esta rápida intervención dos axentes e dos servizos sanitarios polo que conseguiu salvar a vida, falecendo se a intervención houbésese dilatado escasos minutos, dada a natureza e gravidade das feridas causadas polo acusado”, subliña o tribunal, quen asegura que o sospeitoso “realizou a acción ao non tolerar que a súa exmoza puxese fin á súa común relación de parella no libre exercicio da súa liberdade como muller”.
“O acusado actuou de forma aleivosa”, destacan os maxistrados, os cales describen o ataque como “súbito, repentino, inesperado, por sorpresa e sen dar opción real á vítima, desarmada, a defenderse”. Por iso, condenaron ao acusado como autor dun delito de asasinato en grao de tentativa, en lugar de homicidio.
