Vimianzo conmemora o día dos Monumentos e Sitios cun completo programa de actividades
09:10 18/04/18
castro-barreiras-vimianzo
Con motivo do día internacional dos Monumentos e Sitios desigando pola UNESCO, que se celebra hoxe, o concello de Vimianzo únese a esta conmemoración con varios actos que se suman á súa aposta por poñer en valor o patrimonio como ferramenta social, cultural e desenvolvemento local.
Así, ademais das visitas que realizan estes días os centros escolares e as distintas asociacións culturais da comarca, hoxe o alumnado do CEIP de Baíñas pasará unha mañá gozando dos “monumentos e sitios” máis destacados da capital municipal. Coñecerán o xacemento arqueolóxico do Castro das Barreiras, en plena escavación, o castelo e a súa artesanía ao vivo, e finalmente o pazo de Trasariz. As visitas escolares nas Barreiras están sendo todo un éxito, creando sinerxías co castelo de
Vimianzo e os batáns do Mosquetín, xa está ocupada a axenda practicamente durante todo o que queda de mes.
Mañá xoves, ás 17:00 horas, realizarase unha nova visita aberta ao Castro das Barreiras, para coñecer o avance das investigacións arqueolóxicas, explicado polo propio director da campaña Ángel Concheiro. Para participar, hai prazas limitadas, polo que se require inscrición previamente a través do correo electrónico [email protected] ou ben chamando ao 981 716 001 en horario de mañá.
Para o venres 20, haberá unha conferencia ás 20h na Casa da Cultura baixo o título “Patrimonio, espello de nós”. Trata de aproximarnos ao concepto de ben cultural como herdanza compartida, desde as súas orixes aos nosos días. Falarase dos novos retos do patrimonio, o seu valor e uso, e da súa relación coa identidade dos pobos e ponte entre culturas nun mundo cada vez máis globalizado. Ese mesmo día o concello participará en Barcelona no B-Travel, Salón Internacional de Turismo de Cataluña. Convidado pola Deputación da Coruña, o concello de Vimianzo presentará a súa liña de traballo de promoción do patrimonio, neste caso falarán das industrias e oficios tradicionais, como a artesanía que se elabora no castelo e o conxunto
etnográfico do Mosquetín. A presentación terá lugar ás 12:45 horas “A industria antes da súa revolución, a tradición como revulsivo turístico dun entorno rural. O caso de Vimianzo, Costa da Morte, Galicia".
Xa para finalizar a semana, presentarase na Casa da Cultura, o luns 23 ás 12:00 horas, a exposición "Celebramos o noso patrimonio", organizada desde a biblioteca municipal de Vimianzo coa colaboración da Biblioteca Provincial da Coruña. Unha mostra bibliográfica e fotográfica na que se reúnen estudos e escritos sobre a riqueza patrimonial do concello vimiancés postos a disposición dos usuarios.
Escoliña de arqueólogos
Mentres, no marco do programa de divulgación #AbrirAsBarreiras do Concello de Vimianzo xa contan con visitas escolares para fomentar o amor polo Patrimonio dende cativiños. Onte foron os nen@s do CEIP Labarta Pose de Baio - Zas. [fbvideo link="https://www.facebook.com/castrodasbarreiras/videos/194404737719240/?t=11" width="700" height="400" onlyvideo="1"]Novas relacionadas
- 2018: Vimianzo abre as súas Barreiras
- 2018: Vimianzo volverá a escavar o Castro de Barreiras
- 2018: O Triángulo da Historia une a Cabana, Vimianzo e Zas
- 2011: O concello de Vimianzo afeita o Castro de Barreiras e agarda o permiso de excavación.
- 2011: Vimianzo presenta un completo programa cultural de outono.
- 25-10-10: Piden a catalogación do Castro de Barreiras como Ben de Interese Cultural.
- 14-10-10: O Castro de Barreiras: o expediente X da arqueoloxía galega.
Fonte
- Redacción QPC ([email protected])