Zas volverá solicitar a declaración da Festa da Carballeira como Festa de Interese Turístico de Galicia
17:44 23/10/18
Unha imaxe da tradicional festa, anterior aos anos 80. antes mesmo de que a A.C. Castro Meda recuperase a cita
Así o decidía hoxe o pleno ordinario do Concello de Zas. A corporación, aprobou por unanimidade, unha moción pola cal o Concello vai solicitar á Xunta de Galicia a declaración da Festa Carballeira de Zas como Festa de Interese Turístico de Galicia.
En todo caso, esta non é a primeira vez que se fai a solicitude polo que “desta vez agardamos que consigamos que a Festa da Carballeira de Zas sexa declarada como Festa de Interese Turístico de Galicia”, sinalou o alcalde Manuel Muíño.
Falamos dunha festa tremendamente singular, cunha tradición histórica de arraigo e compromiso ca terra, que este pasado verán celebrou, nada menos que a súa 35ª edición. Foi ou exemplo máis da maxia que se xera nun dos escenarios naturais máis auténticos de Galicia, como é o da carballeira de Velar, polo que levan pasado referentes da música folk do panorama nacional e internacional, e que ademais xa é un dos centros da música tradicional galega.
