Imprimir

A falta de persoal deixa sen correspondencia a centos de veciños e veciñas de Ponteceso

que pasa na costa | 19 de setembro de 2018

oficina-correos-neano-ponteceso A oficina de Correos de Neaño está pechada dende o pasado 12 de setembro Centos de veciños e veciñas de Ponteceso sofren nos últimos días atrasos na entrega da súa correspondencia nin paquetería. Os motivos son, segundo denuncian dende a CIG-Correos, a falta de contratación de persoal para cubrir as ausencias de dous traballadores que están de vacacións que, ademais do retraso nas entregas, ocasiona unha sobrecarga de traballo. Ao parecer, o pasado 7 de setembro comezaron as vacacións dous dos traballadores da sucursal pontecesá que se encargan do reparto da correspondencia nas parroquias de Cesullas, Nande, Sarces, Serantes, Soesto, Traba e parte da parroquia de Laxe. Un deses traballadores tamén se encarga da oficina de atención ao publico de Correos, situada en Neaño. Precisamente os días 10 e 11 de setembro (ambos festivos locais) non houbo reparto de correspondencia debido a que o reparto depende da oficina de Correos de Ponteceso. "Ademais desta circunstancia, dende que comezaron as súas vacacións e até a data de hoxe (en referencia a onte), Correos non contratou persoal para substituír os dous traballadores, de forma que os veciños e veciñas destas parroquias levan dende o día 12 de setembro sen recibir a súa correspondencia e tamén sen prestar servizo a oficina auxiliar de Correos de Neaño", sinalan dende o sindicato. "Esta situación causa un gran prexuízo as persoas afectadas e tamén ao resto dos traballadores e traballadoras que non están de vacacións, xa que con dous empregados menos resúltalles máis complicado sacar o reparto adiante e asumir toda a correspondencia urxente" indican dende a CIG-Correos. Por todos estes motivos, solicitan que se dote o centro de traballo de Ponteceso de persoal suficiente para que se poidan asumir as cargas de traballo dos envíos que hai pendentes de reparto nesa unidade. Fonte
Podes ver este artigo na próxima dirección /articulo/cabana/a-falta-de-persoal-deixa-sen-correspondencia-a-centos-de-vecinos-e-vecinas-de-ponteceso/20180919061900089180.html


© 2020 que pasa na costa

COPYRIGHT 2019 QUE PASA NA COSTA

Banner xunta axudas copia