Imprimir

A Previa: o Pontevedra - Ferrol condiciona os arrastres

que pasa na costa | 16 de febreiro de 2018

Parece un pouco raro irnos a falar dun partido de Segunda B a estas alturas de tempada, pero o certo é que moitos equipos costeiros estarán pendentes do encontro de Pasarón, do que depende en boa medida a cascada de descensos de todos os anos, na que se poden ver involucrados un montón de equipos de Preferente, 1ª e 2ª Galicia. En Preferente Norte temos partidos vitais na loita por escapar dos postos de descenso e arrastre para os nosos equipos. Un Xallas en excelente forma viaxa a Escairón, no traxecto máis longo da tempada, para tentar seguir coa súa magnífica xeira. O Sofán recibe nas Eiroas ó At. Arteixo, nun derbi de cercanías que se antolla moi importante para os de Iván Cancela. O Dumbría ten un partido a vida ou morte no Conco ante un rival directo, o Boimorto, do que poden depender un tanto por cento elevado das posibilidades de permanencia do equipo de Nacho. Imaxe do Corme-Buno -Foto-Mery Villar Outes e Buño xóganse as súas posibilidades de salvación esta fin de semana Se na Preferente a xornada é importante, en 1ª xa non digamos. Temos un tremendo derbi en Verdillo, entre o Soneira e o conxunto local. Volve Pedro Gómez á que foi a súa casa un par de anos, e faino tentando exprimir as últimas opcións de acercarse ós equipos punteiros da liga. E o San Lorenzo, xa sen Oscar Suárez, busca sumar para ter esperanzas de salvación, que agora mesmo están lonxanas. Será un partido dos de non perderse. O Fisterra viaxa a Ribeira noutro encontro fundamental. Catro puntos separan a ambos equipos, e de conseguir vencer, o Fisterra tería posto o clavo no peito do conxunto do Barbanza. Non é menos importante o do Baio, que recibe ó Sigüeiro nun duelo decisivo, entre dous conxuntos separados por un só punto e que ven a plaza de arrastre queimándolle nos pes. Na Liga da Costa, o líder Mazaricos ten un partido moi difícil contra o quinto clasificado, o Cerqueda, no que será o partido da xornada. Os perseguidores teñen encontros moi complicados tamén. O Corme visita Muxía, e o Baíñas vai a Malpica, dúas saídas nas que non será fácil puntuar. A Esteirana recibe a un Zas á alza que seguro lle poñerá as cousas costa arriba. Na zona baixa hai un dramático Coristanco - Outes, que deixará ó perdedor moi tocado. O Buño recibindo ó Lira e o Camariñas co Puenteceso tentarán ir escapando da zona de perigo, mentres que o Cee ten un encontro fundamental en Monte Louro. Xa vemos que non hai respiro para ninguén, e os puntos están moi caros nestas datas. Muros e Volantes seguen na súa pugna Na 3ª Galicia, máis do mesmo. Muros e Volantes seguen coa súa pelexa polo título. Dous partidazos esta semana, o Camelle - Muros e o Volantes - Cabana, que decidirán gran parte do destino desta 3ª, pois tanto Camelle como Cabana son perseguidores dos equipos muradáns. O Ameixenda - Nantón é o outro partido importante da xornada, mentras que Porteño, Laxe ou Castriz terán que seguir vencendo para tentar loitar polas plazas de promoción, que están verdadeiramente caras na nosa 3ª.
Podes ver este artigo na próxima dirección /articulo/deportes/a-previa-o-pontevedra-ferrol-condiciona-os-arrastres/20180216060503087076.html


© 2019 que pasa na costa

COPYRIGHT 2019 QUE PASA NA COSTA