O Fútbol da Costa ao completo lanza unha mensaxe de apoio ao Dépor

Todos e cada un dos clubs do Fútbol da Costa veñen de asinar este comunicado de apoio ao Real Club Deportivo da Coruña no marco desta polémica situación co caso Fuenlabrada.

deportivo

FútbolQPC

19:19 25/07/20

COMUNICADO DO FÚTBOL DA COSTA EN APOIO AO DEPORTIVO

A costa da Morte é unha bisbarra de moi fonda raigame e tradición futbolística, aquí sentimos o fútbol de xeito especial e ese sentimento levámolo canda nós en incontables ocasións ata o estadio de Riazor cando xoga o R.C. Deportivo da Coruña, clube referente do noso fútbol.

Dito isto, e ante as graves consecuencias que esa inexistente derradeira xornada de Liga da Segunda División pode acarrear para o equipo herculino, o fútbol da Costa da Morte apoia as medidas levadas a cabo polo propio clube, pero tamén as de institucións coma o Concello da Coruña e a propia Xunta de Galicia, despostas a esixir todas as responsabilidades que sexan precisas, encamiñadas a clarexar as posibles neglixencias nas que se houbese podido incorrer.

O fútbol tamén é solidariedade, veciñanza e encarna uns valores que endexamais deben lixarse. Velar por eles significa implicarse ante as dificultades. A igualdade é a base do xogo limpo, e sen esa premisa calquera competición fica adulterada e perde sentido.

Por iso mesmo, todos os abaixo asinantes estamos co Depor, e neste intre todos na Costa da Morte, vestimos a camisola branquiazul.