Venres. 29.03.2024
El tiempo

"Non creo que poida ser considerada unha youtuber. Son máis ben unha paiasa"

"Non creo que poida ser considerada unha youtuber. Son máis ben unha paiasa"
Irene Martínez Experiencias do día a día, combinadas cun pouco de humor e anécdotas. Así describe Irene Martínez López (Corcubión, 1998) o seu canal de Youtube #SoyIrene, un reality show da vida desta moza e de tódolos seus amigos e amigas en Corcubión. O seu videoclip 'Mira Pa Fuera', publicado o 1 de agosto deste mesmo ano, acada xa as 14.000 visualizacións. “Todo o que subimos a #soyirene é improvisado”, afirma a youtuber máis exitosa da #CostadaMorte. Falamos con ela.
  • QPC: Que é #SoyIrene?
É un reality show da vida de Irene e da de tódolos seus amigos e amigas en Corcubión. Nos vídeos móstranse as experiencias do día a día, combinadas cun pouco de humor e anécdotas... ou opinións que Irene comparte.
  • QPC: Como se che ocorreu gravar e subir o primeiro vídeo?
A idea xorde unha tarde de verán. Estáballe eu contando unha anécdota tola ao meu amigo Carlitos (o director e editor), e respondeume: “encantaríame facer un reality da túa vida”. Eu díxenlle que si (non sei dicir que non) pero non pensaba que se ía atrever a facelo de verdade. Cando a semana seguinte apareceu cun micrófono para gravar, xa non había marcha atrás!
Adoro Paquita Salas e admiro moito a actuación de Brays Effe
  • QPC: Tes algún referente nesta canle no que te fixaras?
A verdade é que non. Aínda que cando despois de sacar a primeira temporada estrearon Paquita Salas en Netflix, lembroume ao formato. Adoro Paquita Salas e admiro moito a actuación de Brays Effe.
  • Que tipo de contido colgas? Que temas prefires cantar?
A verdade é que o meu contido favorito é o improvisado. Todo o que subimos a #soyirene é improvisado, e as miñas partes favoritas son nas que pasan cousas que ninguén esperaba, como cando caín do barco. Respecto á música... A verdade é que nunca destaquei polo meu talento cantando! Carlitos tivo a idea de sacar unha canción do verán. Eu só de pensar en facer o videoclip e logo poder escoitar a canción cos meus amigos...pareceume unha idea perfecta. O tema que sacamos supera as expectativas que eu tiña, a verdade é que me encanta.
  • QPC: Cantos seguidores tes actualmente? E cantas reproducións acadan xa os teus vídeos?
Creo que hai menos seguidores que nun principio. A primeira temporada chegaba creo que ás 5.000 visualizacións, mais a segunda xa ronda os 3.000. Aínda que o que tivo máis éxito foi a canción, na que temos xa 14.000!
  • QPC: Quen é a Irene que se agocha detrás de #SoyIrene? Parecédesvos ou non?
Somos a mesma persoa! Aínda que é certo que no reality esaxero algunhas facetas miñas e non amoso outras. Eu xa de por min son esaxerada, pero cando me poñen unha cámara diante...parezo máis tola! A miñas facetas de seria e responsable non saen reflexadas porque sería moi aburrido. A xente quere rir, non escoitarme falar de política.
Para min, o verdadeiro youtuber é Carlitos, que edita e sube todos os vídeos
  • QPC: Hai moitos casos de éxito entre youtubers? Ti asumíchelo como un futuro traballo ou é só un pasatempo?
Non creo nin que me poida chamar youtuber. Para min, o verdadeiro youtuber é Carlitos, que edita e sube todos os vídeos. A min o que me gusta é actuar e facer rir, mais se tivese que subir eu os vídeos, probablemente sería un desastre!
  • QPC: Algunha vez te sentiches incomprendida porque a familia ou amigos non entenden o fenómeno youtube?
Si. Os meus pobres pais non o pasaron moi ben ao comezo...eu entendo que para eles é duro ver como a súa filla se expón ao público e ás posibles críticas que iso poida traer. Igualmente, nunca me prohibiron nada e estou moi contenta con como o levaron. Grazas papus!!
  • QPC: Gústache que te chamen youtuber?
Non me molesta, é unha satisfacción. De todas formas, como dixen antes, non creo que poida ser considerada unha youtuber. Son máis ben unha pallasa!
  • QPC: Imaxinabas que a xente acabaría falando do teu reality show?
A verdade é que para nada!! Cando empezamos foi totalmente querendo pasalo ben no círculo de amigos e pouco máis, pero chegamos a un punto que non nos esperabamos, sobre todo despois da canción. Estamos moi agradecidos por todo o apoio.
Carlitos quere terceira temporada, así que en principio haberá
  • QPC: Haberá novos capítulos?
Eu sempre digo que non dou para máis! Non me creo que a miña vida sexa tan interesante como para facer tres temporadas sobre ela, mais Carlitos quere terceira, así que en principio, terceira haberá! https://www.youtube.com/watch?v=HD4HapZqxF0

Comentarios