Imprimir

Novas normas na “nova normalidade”

que pasa na costa | 28 de xuño de 2020

As verbenas poden volver celebrarse con rigurosas normas
As verbenas poden volver celebrarse con rigurosas normas

Como xa indicabamos no noso post anterior, entrar nesta "nova normalidade" non supón a fin das medidas de prevención e precaución. E tampouco é a fin dos nosos artigos!
Seguimos recordando que continúa o estado de crise sanitaria e, por tanto, debemos observar aínda unha serie de restricións.

Porén, e agora xa dende a Administración galega, estas medidas irán relaxándose mentres a situación epidemiolóxica siga a progresar favorablemente (e os posíbeis "rebrotes" sigan baixo control).

Pois ben, temos norma nova e temos instrucións novas: 

(Entrarán en vigor, algunhas delas no propio 27 de xuño, día da publicación do acordo; pero outras o 1 de xullo. Tede isto presente)

Trae novidades importantes.


Uso de máscaras

Refórzanse as normas sobre o seu uso.
 Así, indícase que son obrigatorias na rúa, e en calquera espazo ao aire libre. Tamén son obrigatorias en calquera espazo interior. 

Pero ollo, isto non supón ningún cambio con respecto ao réxime actual, pois a máscara é obrigatoria nos casos nos que non se poida manter a distancia de seguridade.
Por tanto, cando esta distancia estea garantida, podemos retirala (momentaneamente, claro). E, por suposto, tamén cando esteamos a desfrutar dunha terraza ou dun establecemento hostaleiro.


Novidades musicais

A nova norma inclúe mencións específicas para coros e orquestras.

Con respecto aos primeiros, reforza a obriga de manter a distancia, e recorda que o uso de máscaras, por incómodo que puidera resultar, é obrigatorio. Mesmo nos ensaios.

As bandas e orquestras deberán manter a distancia, e o uso de máscaras é obrigatorio. Pero, como non podía ser doutro xeito, vocalistas e intérpretes de instrumentos de vento, poden retirar a máscara cando vaian intervir. 




Aumentos de cabida

Os albergues poderán incrementar capacidade ao 75% e tamén as actividades infantís e xuvenís incrementan até a mesma porcentaxe, con máximos no interior (150 persoas incluídxs xs monitores) e no exterior (250, tamén contando monitorxs).

Público en rallyes, eventos de atletismo, remo ou similares será dun máximo de 1.000 persoas (con distancia e máscaras); mais deberá obterse autorización municipal, e tamén autonómica.


Vai de baile!

As discotecas abren! (E tamén pubs, salas de festas e salas de concertos)
. Cunha capacidade de dous terzos, tanto en mesa como en barra, manténdose a distancia entre as persoas ou entre os grupos de persoas asistentes. Estes grupos non poderían ser maiores de 25 persoas.

As pistas de baile tamén abren, pero con límite: debe asegurarse a "dispoñibilidade" de tres metros cadrados por persoa que as use.
 Recordemos que, como non podía ser doutro modo, o uso de máscara é obrigado, para asistentes e para o persoal.

Os locais manterán un rexistro, que é voluntario, de números de teléfono de persoas asistentes; coa finalidade de permitir un seguimento de casos no caso de contaxios. Estes datos estarán sempre amparados pola normativa de protección de datos, e só poden usarse para comunicación coa Administración Sanitaria.

E... volven as verbenas!

As cifras máxicas son: 

    •    3 metros cadrados por persoa
    •    Se o terreo ten menos de 8.000 metros cadrados, máximo de 1.000 asistentes
    •    Se o terreo ten máis de 8.000 metros, 2.000 persoas no público.
    •    4 metros de distancia entre público e escenario.

(Estes números poderían sobrepasarse, mais só con autorización expresa da Dirección Xeral de Saúde Pública)

O uso de máscara é obrigatorio, como tamén o é a existencia de xel hidroalcólico no recinto.


Pois estas son as principais novidades das novas instrucións. 
Recordade que non son as únicas, e para maior detalle consultade o texto do Diario Oficial de Galicia.

 Estade atentxs a próximas novidades!
 E bo verán! Agora xa con festas... que sen elas non é verán.
 

Artigos explicativos de Miguel Vieito Villar

Podes ver este artigo na próxima dirección /articulo/costa-da-morte/novas-normas-nova-normalidade/20200628102750120250.html


© 2020 que pasa na costa

COPYRIGHT 2019 QUE PASA NA COSTA

Banner xunta axudas copia