O Comité de Ferroatlántica esixe a non segregación das actividades produtivas

O Comité de Ferroatlántica esixe a non segregación das actividades produtivas

11:04 11/10/16

A producion hidroelectrica e as fabricas de ferroaleacions de Ferroaltantica

A produción hidroeléctrica no Xallas e as fábricas de ferroaleacións de Ferroaltantica en Cee e Dumbría teñen que estar vinculadas

A semana pasada era a Mesa pola Normalización Lingüística a que protestaba porque a empresa Ferroatlántica non aceptaba informes dos seus traballadores en lingua galega. Hoxe tócalle o turno ao Comité de Empresan de Cee e Dumbría, que semellan alarmados pola posible segregación das actividades produtivas das fábricas costeiras. A posta en venda das centrais hidroeléctricas do Grupo de Villar Mir, a pesar de ter en marcha tes novas minicentrais no río Xallas, fan saltar todas as alarmas.

Pero o caso é que “as actividades de enerxía eléctrica e ferroaleacións forman unha unidade produtiva única” (non se poden desvicular as actividades das fábricas de produción de ferroaleacións de Dumbría e Cee das centrais hidroeléctricas do río Xallas), unha realidade ratificada por diferentes leis e polo Parlamento galego en unanimidade, pero que ultimamente sendo foco de dúbidas na palestra pública.

Nese sentido, a apertura dunha nova fábrica de silicio en Sabón puxo en alerta aos traballadores da zona e por iso o Comité quere esixir á Xunta “a non segregación das actividades produtivas e o mantemento de postos de traballo, así como as inversións necesarias para este fin”.

Ademais, piden á presidencia da empresa que sinalen o apoio público a esta esixencia, e instan á Xunta “a respectar os compromisos ratificados o mantemento da legalidade vixente relativa á non segregación das actividades produtivas”.

Nese sentido, o Comité lembra que “Ferroatlántica ten as concesións para explotar os nosos recursos naturais, beneficiándose de concesións públicas supeditadas ó mantemento e xeración de postos de traballo, así como a declaración de utilidade pública para a expropiación de terreos e para a construción e explotación das centrais”.