O teatro afeccionado segue moi vivo en Zas
08:15 29/05/18
O teatro afeccionado está de noraboa cando nun mesmo concello ten o seu propio certame, canto ten un grupo de teatro con 35 anos de historia como Badius e cando a escola municipal infantil consegue reunir a uns trinta alumnos e alumnas. E isto pasa en Zas.
A III Mostra de Teatro Afeccionado "Labarta Pose" - organizada polo concello de Zas - chegou o pasado domingo ao seu fin coa entrega de premios. Remataron así cinco días de espectáculos nos que os veciños e veciñas tiveron a oportunidade ver obras de teatro interpretadas por compañías de toda a comunidade e que agochan moitas horas de ensaio, de atrezos, de broncas,... e todo "por amor ao arte".
O domingo tivo lugar o acto de entrega de premios da III mostra de teatro afeccionado "Labarta Pose" organizada polo concello de Zas
"Anónima 18" - de Ditirambo Teatro Coruña de Montrove - e "Mass co-medias" de Os Kabramakabra de Asados (Rianxo) foron as dúas gañadoras desta terceira edición da mostra de teatro afeccionado. A primeira era un drama que, a criterio do xurado, foi a mellor das obras represetadas no certame. E a segunda, unha comedia, foi a mellor obra elixida polo público. Tamén houbo premio para o mellor actor, que recaeu en Luismi Ramos pola súa interpretación na obra "Mass-comedias" de Os Kabaramakabra; e premio para a mellor actriz que foi para Chelo G. Falcón pola súa interpretación en "Anónima 18".
Chelo G. Falcón recibiu o premio á mellor actriz polo seu papel en "Anónima 18"
Todos os premiados recibiron un trofeo conmemorativo realizado como todos os anos polo centro especial de emprego de Aspaber - asociación de pais de discapacitados psíquicos de Bergantiños -. Ademais, cada unha das cinco compañías finalistas recibiron un premio de 500€.
Clausura da XI escola municipal de teatro infantil
Marco e Pibe, do grupo de teatro Badius, son os encargados de dirixir a escola municipal de teatro infantil
Antes do acto de entrega de premios - presidida polo alcalde de Zas e polo concelleiro de Cultura - tivo lugar a clausura da XI Escola Municipal de Teatro Infantil con tres obras interpretadas por actores e actrices que a pesares da súa xuventude foron capaces de ofrecer momentos de risa e reflexión aos espectadores. Son xa once anos os que Pibe e Marco - os directores da escola e membros do grupo Badius de Baio, levan introducindo no mundo do teatro a ducias de nenos e nenas do concello de Zas. Moitos deles continúan hoxe facendo papeis noutros grupos de teatro conservando así a súa afección polas artes escénicas.
Con estas dúas actividades, demostrouse o domingo que o teatro afeccionado está máis que consolidado en Zas. Longa vida!
Novas relacionadas
- Este sábado arrinca a Mostra de Teatro Afeccionado Labarta Pose de Zas
- Os auditorios de Zas e Baio prepáranse para a III Mostra de Teatro Afeccionado.
- A III Mostra de Teatro Afeccionado “Labarta Pose” xa ten finalistas
- Talía Teatro lembrou os 40 anos do teatro profesional na Gala dos XXII Premios de Teatro María Casares.
- Os Fouciño volverán situar a Baio no centro do audiovisual galego
- III Mostra: Arranca a III edición da Mostra de Teatro Afeccionado de Zas.
- II Mostra: Zas revitaliza o teatro afeccionado
- II Mostra: “Esperamos que nesta segunda edición Zas consolide a Mostra de Teatro Afeccionado dentro da axenda cultural”
- I Mostra: Zas consolida a Mostra de Teatro Afeccionado dentro da súa axenda cultural
- A figura de Labarta Pose reactívase coa visita do seu bisneto.
- Redacción QPC ([email protected])
- Concello de Zas