Imprimir

Tesouros da Parroquia de Berdoias (IV): A Eira do Buxán, en Santa Cristiña

Moncho Gándara | 01 de agosto de 2020

Continuamos da man “Asociación Parroquial de Berdoias“ e o Seminario de Estudos Comarcais (SEMESCOM), recuperando o rico e variado patrimonio que atesouran os lugares da parroquia vimiancesa de Berdoias. Hoxe seguimos ca serie sobre as construcións de transformación de gran, coas Eiras.

Mostra do Patrimonio Material da Parroquia de Berdoias:
Construcións de transformación do Gran (IV):
A Eira do Buxán, en Santa Cristiña

Santa Cristiña é un pequeno lugar de catro veciños, o máis septentrional da parroquia de Berdoias, que aínda conserva hoxe unha abundante, variada e ata singular riqueza etnográfica. E dentro dos elementos do seu patrimonio material destaca A EIRA DO BUXÁN na que, acompañada da súa cabana para gardar o gran, aínda loce un chan empedrado con lousas; e un bordo cun valado perimetral feito a base de antas chantadas verticalmente na terra lixeiramente inclinadas cara fóra, e, a súa vez, combinado e reforzado con cachotería nalgún tramo.

Pero o máis singular e impresionante desta eira circular é a súa ubicación nun espazo elevado, soleado e ventoso, que se atopa enclavado na parte central do Curro de Santa Cristiña, ese fermoso cercado, duns seis ferrados, pechado cun valado de “pedra seca”. Ese cercado de longa historia , xa citado no século XVI polos condes de Altamira, un curro onde se gardaba o gando ceibo que andaba polo monte.

Noutros tempos, nesta mesma eira do Buxán, bestas do monte participaron tamén, co seu pisar, nas mallas do trigo, do centeo e da avea, para separar o gran da palla.


A Eira do Buxán, no medio do curro, vista dende a eira do Camaño

A EIRA DO BUXÁN ENCLAVADA NO MEDIO DO CURRO
A Eira do Buxán enclavada no medio do curro

5 MAPA DAS .EIRAS DE STA. CRISTIÑA-Berdoias-Vimianzo
Mapa das Eiras de Santa Cristiña

Tesouros de Berdoias

Podes ver este artigo na próxima dirección /articulo/vimianzo/tesouros-da-parroquia-berdoias-iv-eira-do-buxan-santa-cristina/20200801102324120995.html


© 2020 que pasa na costa

COPYRIGHT 2019 QUE PASA NA COSTA

Banner xunta axudas copia