Outro proxecto de renovación do pavimento en Vimianzo. Desta volta, trátase da mellora e ampliación da rúa Gándara de Osa. Actuarase entre a estrada AC-552 e o cruce cara Sansobre, dotando a esta vía dun novo firme, ensanchándoo de xeito que quede composto por dous carrís de circulación con zona de aparcamento e beiravía peonil nunha das marxes e nun dos tramos, así como das instalacións de evacuacións de pluviais, así como a instalación e colocación dunha nova rede de alumeado público.
Tamén se formula o soterramento do cableado en dous dos tramos da actuación, así como a construción dunha beiravía peonil no segundo tramo da actuación, a partires do primeiro cruce. Realizarase o recrecido de arquetas e bocas dos outros servizos existentes.

Campaña de roza

Paralelemante, a Xunta comeza esta semana os traballos de roza e limpeza na estrada AC-432 ao seu paso polo concello vimiancés. Unha roza para previr incendios e reforzar a seguridade viaria, retiradando especies pirófilas, aquelas que son máis propensas á propagación do lume.
Tamén se acometen rozas para completar o traballo ordinario de conservación das estradas e reducir progresivamente o uso de herbicidas, dando cumprimento a un acordo parlamentario.

Ademais, realízase o acondicionamento de zonas verdes e sendas peonís, para que estean en condicións axeitadas.