Eu non son Anxo Quintana
Fálase moito estes días dunha frase de Kennedy, das que utilizou no seu discurso inaugural, aquela de “non pense no que o seu pais pode facer por vostede, senón no que vostede pode facer polo seu país”. A razón de lembrar esta frase iluminada pero equivocada na miña humildísima opinión é a da recente chegada o poder de Obama. E o fío de todo isto, onte, outro político iniciaba o seu asalto a particular “casa Branca” do monte Pedroso, co primeiro anuncio de clara vocación electoral do BNG.
O lema é que “eu tamén son Anxo Quintana”. O spot, grosso modo, representa unha asemblea de galegos da época romana reunidos cun orador no centro que fala de que o imperio anda preocupado polas ansias de independencia destas xentes, e pide cabezas e submisión, pide que se delate o protagonista destas demandas, o que o candidato nacionalista, sentado entre os reunidos, erguese para afirmar que el é o culpable, que el é Anxo Quinta, para xusto nese intre ser secundado polo resto dos presentes.
Deixando a un lado a caracterización e estrutura dramática do anuncio, a min me inqueda e moito a ausencia de dirección e claridade na mensaxe de persoas e partidos coma o BNG na súa época mais recente, nos últimos oito anos a lo menos, deixando primeiro as ansias independentistas e o discurso Beirista de esquerda definida, e avogando por unha alianza, por exemplo, cos socialistas de corte constitucionalista, para agora, a un mes dos comicios, volver a batalla independentista cunha mensaxe diferenciada, a de que “antes mortos que de xeonllos” ou “Galicia nación”.
Non pretendo entrar en debates sobre o fondo da cuestión, a da independencia dun territorio claramente diferenciado, con lingua e historia propias e claras raíces que o diferenza do resto do país, pero si admito debates sobre a oportunidade da dirección do BNG por parte de alguén como o actual vicepresidente da Xunta. ¿seguro que Anxo quinta “bebe” das raíces marxistas e de esquerda pura da que xurdiu o partido cando foi fundado?,¿canto de xiro a dereita (pasando brevemente polo centro) hai nas posicións e decisións tomadas por este líder na súa etapa como gobernante?, e por ultimo ¿sinceramente alguén espera que, si o BNG logra o goberno, Galicia vai camiñar cara a independencia?. Posicións ben mais radicais que ningunha adoitada por Quintana na súa vicepresidencia son as que levaron adiante partidos coma o PNV vasco ou CiU en Cataluña, sen lograr nada nin remotamente parecido...
Quedan moitos días para os comicios e seguro que imos falar mais de todo isto. Abstéñanse os defensores doutros partidos e candidatos, e os defensores deste, de atacarme de ningún xeito, adianto xa que eu voto en branco dende hai tempo. So deixo no aire unha seguridade, varias. Eu, que son galego de nacemento e crenza, que me considero critico co que non me gusta no meu pais, e que si, así é, considero que Galicia é e debería ser de facto unha nación, eu, que canso de dicir que nos esquecen e nos condenan dende Madrid.... eu, non son Anxo Quintana.
- José Luis Louzán.