Pequenos e maiores disfrutan do Mes da Fundación Fernando Blanco
Despois da conferencia de Manuel Gago, a pasada semana estivo chea de actividades arredor da Fundación Fernando Blanco e no marco do seu programa O Mes da Fundación Outubro 2015. Un programa para nenos e maiores.
Foron os nenos os primeiros en disfrutar co concerto didáctico dos "Hermanos Quintero" de Colombia. Este concerto está encadrado no Festival anual de Pulso e Púa, organizado pola Agrupación Musical Albéniz da Coruña, e que, a través do Concello de Cee, amablemente llo cederon á Fundación Fernando Blanco para incluilo na súa programación de outubro.
Nenos e nenas que fixeron de directores/as de orquestra, cativos e cativas que cantaron... e ata profesores e profesoras que bailaron. Unha mañá moi divertida e didáctica á que asistiron alumnos e alumnas de 3º e 4º de Primaria dos colexios Eugenio López, Manuela Rial de Cee, Praia de Quenxe de Corcubión e usuarios/as de Aspadex.
Os maiores comezaban a fin de semana de ofrenda floral. O sábado tiña lugar a tradición acción na que profesores/as, alumnos/as e persoal do Instituto, entregaban unha coroa de flores na tumba do mecenas, para acompañar a sentida misa.
E da emoción á risa, e ninguén mellor que Quico Cadaval, un dos pioneiros do concepto monólogo en Galicia, que demostrou coas súas "Pantasmas familiares" que ten milleiros de cousas que contar.
Vindeira cita, coa ciencia
Este sábado 17 de outubro, ás 20:30 horas na Casa da Cultura de Cee, teremos charla científica, unha cousa diferente, un Discurshow "Protón", con Xurxo Mariño (Neurofisiólogo da UDC) e Vicente de Souza (actor).
Novas relacionadas
- Gago inaugurou o Mes da Fundación en clave patrimonial.
- Cee volve celebrar “o mes da Fundación” para alumnos e público en xeral.
Fonte
- Redacción de QPC (info@quepasanacosta.com)