A Deputación encarga un estudo para eliminar as curvas máis perigosas da estrada entre Coristanco e Santa Comba
A Deputación da Coruña vén de publicar a licitación, por un importe de 25.579 euros, da redacción dun proxecto de mellora da seguridade viaria na estrada provincial DP-2904, que conecta os municipios de Coristanco e Santa Comba.
O proxecto abranguerá actuacións en distintos tramos nos puntos quilométricos 6+000, 13+500 e desde o 15+300 ao 17+500, nos termos municipais de Coristanco e Santa Comba. O obxectivo é mellorar o trazado da estrada mediante a eliminación ou suavización de tramos de curvas sinuosas, onde rexistraron diversos accidentes nos últimos anos pese ao bo estado do firme da calzada.
O proxecto estudará técnica e económicamente posibles variantes de trazado nos treitos con maior sinistralidade, co fin de garantir unha circulación máis segura para as persoas usuarias desta vía de comunicación estratéxica na comarca.
A actuación dá cumprimento ao compromiso adquirido polo presidente da Deputación, Valentín González Formoso, co alcalde de Santa Comba, Alberto Romar, quen solicitara a intervención da institución provincial para mellorar a seguridade do vial.
A licitación da redacción do proxecto chega tamén despois da visita realizada pola deputada provincial de Vías e Obras, Mónica Rodríguez, quen percorreu a zona acompañada de representantes do goberno municipal e técnicos do servizo provincial de estradas para identificar sobre o terreo os puntos máis problemáticos.
A Deputación inicia así o proceso necesario para acometer as obras de mellora, avanzando no seu compromiso coa seguridade viaria e co equilibrio territorial da rede provincial de estradas.