13 espectáculos de primeira calidade convirten o Pazo da Cultura nun gran epicentro cultural galego

Elisa e Marcela abren hoxe os Venres Culturais de Carballo

Hoxe venres arrinca o completísimo programa, cargado de “culturalina”, dos Venres Culturais de Carballo. E aínda queda algún que outro bono á venda, polo que por 13 euros poderedes disfrutar de 3 obras de teatro e o concerto de De Vacas. Un luxo o que temos no Pazo da Cultura de Carballo, que gracia sá participar na Rede Galega de Teatros e Auditorios consegue formalizar un programa de 13 actuacións de primeira calidade ata finais de abril.

A premiada Elisa e Marcela, unha coprodución de A Panadaría co Centro Dramático Galego con vinculación costeira, abre este circuíto, xestionado pola Axencia Galega das Industrias Culturais (Agadic), e conta cun investimento de 40.650 euros, achegados pola Agadic e mailo Concello.

Entre as propostas da nova carteleira destaca un dos espectáculos que se estrean nesta temporada: Casa O’Rei, co que Ibuprofeno Teatro completa a súa triloxía gastronómica e que poderá verse no Pazo da Cultura o 23 de marzo. A montaxe leva a escena un texto de Santiago Cortegoso, quen propón un xogo escénico e dramatúrxico a partir de O Rei Lear de William Shakespeare, pero aquí ambientado nunha típica casa de comidas galega. Espectáculos para público adulto Para o público adulto están pensadas tamén outras sete producións que pasarán por Carballo nestes meses. En marzo, Helena: Xuízo a unha lurpia (día 9), unha revisión contemporánea do mito de Helena de Troia a cargo Teatro do Atlántico; e o concerto de De Vacas (16 de marzo), coas súas versións á galega dun amplo abano de estilos musicais. Pola súa banda, o mes de abril concentrará os espectáculos de danza da programación da Rede, dándolle forma á súa vez ao ciclo monográfico Primavera enDanza. O bailarín e mestre Toni Jodar explicará en Una conferencia bailada (día 13) as tendencias actuais da danza, dende a experimentación á relectura das tradicións. A variedade desas tendencias reflíctese tamén no resto das pezas que pasarán por Carballo: en Hollywood (día 20), de Andrea Quintana, a danza e o teatro dialogan co cinema; Toda a beleza do mundo (día 21) é un solo de danza e voz para exterior a cargo de María Move; a peza grupal Now (día 27), da compañía vasca Lasala, inspírase no proceso de renovación física da aguia real americana; e o espectáculo de Janet Novás Si pudiera hablar de esto no haría esto (día 28) formula un diálogo entre a intuición no movemento e o cuestionamento crítico desa intuición. Espectáculos para público familiar O teatro, a música e a danza tamén conviven na oferta para público infantil. Así, na programación figuran os espectáculos teatrais A galiña azul (11 de marzo), unha peza baseada no conto de Carlos Casares na que Tanxarina mestura monicreques e actores, e Danza da choiva (18 de marzo), de Elefante Elegante, que trata o cambio climático dende a premisa dun mundo no que para de chover para sempre combinando teatro xestual, títeres e danza. A música chega a esta da carteleira familiar con Pitusa Semifusa e os estilos musicais (25 de febreiro), un espectáculo que lle ensina aos máis pequenos o rock, o funky, o reggae e demais xéneros con enerxía e diversión. Por último, as espectadoras e espectadores máis novos poderán desfrutar e aprender coa peza coreográfica Vuelos, de Aracaladanza, inspirada na obra de Leonardo da Vinci e os seus deseños de ás. As funcións de Elisa e Marcela, Pitusa Semifusa e os estilos musicais, Helena: xuízo a unha lurpia, A galiña azul, Danza da choiva e Casa 0’Rei, así como o concerto de De Vacas danlle forma aos denominados Venres Culturais do Pazo da Cultura.

Máis información

• QPC: Unha boa dose de Culturalina para os venres carballeses.
• 3 proxectos culturais con semente da Costa da Morte recuperan auténticas historias de igualdade.
• www.agadic.gal/Axenda.

Fonte

• Redacción de QPC (info@quepasanacosta.com).