O alcalde de Laracha puxo voz no Senado á "Galicia Rural" e á "España Vaciada"
Este luns, o alcalde da Laracha, José Manuel López Varela, participou en Madrid, no Senado, no Acto conmemorativo do sétimo aniversario da Manifestación da España Vaciada, organizado pola Cátedra Estrella Galicia de Desarrollo Rural do Foro Next Educación dentro do seu VI Estudio "Evolución de la percepción de los avances en la España Rural".
O Acto foi dirixido polo xornalista Manuel Campo Vidal, contou coa intervención de benvida o vicepresidente do Senado, Javier Maroto, e foi clausurado o secretario xeral para o Reto Demográfico, Francesc Xavier Boya.
No acto interviñeron 9 representantes de administracións e institucións doutras tantas provincias españolas. A intervención de José Manuel López Varela estivo centrada nas iniciativas municipais dirixidas a xerar oportunidades de desenvolvemento económico e na protección e posta en valor dos espazos naturais.
Non é moi longa así que a transcribimos:
Señoras e señores,
É unha honra dirixirme hoxe a esta Cámara para falar de algo que, para os que procedemos desta rexión, non é só un concepto, senón unha realidade cotiá: o valor da España rural.
Permítanme comezar dándolles un pouco de contexto. Son o alcalde do concello da Laracha.
A Laracha está situada na área metropolitana da Coruña, a só 20 quilómetros da cidade e conectada por autoestrada. Temos 12.000 habitantes e limitamos con dous concellos, Arteixo e Carballo, que teñen case o triplo da nosa poboación. E, con todo, somos un concello en continuo crecemento demográfico.
Somos, en esencia, un reflexo do que é hoxe unha parte da Galicia rural: un territorio que combina zonas urbanas, con tres vilas que concentran a actividade, e unha realidade profundamente rural, con 311 núcleos de poboación repartidos en 125 quilómetros cadrados. Un territorio predominantemente interior, pero con acceso ao mar en Caión, que tamén marca o inicio xeográfico da Costa da Morte.
Esta realidade ten un impacto directo na xestión municipal. Porque un concello como o noso significa dar servizos a todas e cada unha destas comunidades. Para que vos fagades unha idea, xestionamos máis de 600 quilómetros de estradas municipais, unha superficie incluso maior que a distancia entre A Laracha e Madrid.
Polo tanto, a nosa gobernanza baséase en tres piares moi claros: pensar, planificar e actuar.
Temos un plan de desenvolvemento urbano, pero fomos máis alá. Definimos a nosa propia estratexia para a conservación dos nosos espazos naturais: ALANAT, A Laracha Natural. Esta iniciativa combina a participación cidadá co coñecemento experto para definir accións específicas, e tamén queremos complementala impulsando designacións urbanísticas como o ENIL (Espazo Natural de Interese Local), co obxectivo de proporcionar a máxima protección a áreas de especial valor, como todo o noso litoral.
Un exemplo disto é a adquisición, en 2023, da Carballeira de San Fins: unha área de 3 hectáreas con máis de 1.300 árbores catalogadas, vinte delas centenarias, que agora estamos a poñer en valor como patrimonio rural.
Creo firmemente que o desenvolvemento dun concello debe ser equilibrado. A Laracha conta cun parque empresarial líder no norte da provincia da Coruña, que impulsa a actividade industrial, o desenvolvemento económico e a creación de emprego con empresas de primeiro nivel alí radicadas. Pero, ao mesmo tempo, traballamos para conservar as zonas rurais e os nosos espazos naturais, creando as condicións axeitadas para que tamén xurdan alí oportunidades de emprendemento vinculadas a ese entorno.
Isto inclúe, por exemplo, a granxa experimental da Fundación Galicia Sostible en Montemaior. Este proxecto levou o concello a investir na restauración da casa reitoral da parroquia, un edificio histórico que se converterá nun centro de excelencia para o sector primario.
Todo isto parte dunha idea moi clara: as zonas rurais teñen presente e futuro. E ese futuro depende de crear oportunidades, reter a poboación e ofrecer aos cidadáns emprego, bos servizos e unha alta calidade de vida.
Agora ben... os concellos poden liderar, podemos innovar e podemos xestionar, pero necesitamos o apoio e o compromiso doutros niveis de goberno. E tamén necesitamos a iniciativa dos emprendedores para garantir que este desenvolvemento sexa verdadeiramente sostible e duradeiro.
Para rematar.
Coidar as zonas rurais non se trata só de preservar o noso territorio: trátase de garantir oportunidades, equilibrio e futuro para todo o país e a súa xente. E esa é unha tarefa que nos corresponde a todos.
Moitas grazas e bos días.