Carolina Castiñeiras apela a mocidade como “motor de cambio” na Laracha

Non faltou portavoz nacional, Ana Pontón, ao mitin de presentación da candidatura do BNG en Laracha, encabezada por Carolina Castiñeiras, unha candidatura que “combina experiencia e renovación e que inclúe moita xente moza”. Precisamente á mocidade interpelou a líder do Bloque para ser motor do cambio galego nas vindeiras eleccións municipais.

“Carolina ten proxecto e ten confianza no potencial deste concello e con ela está unha candidatura que combina experiencia e moita renovación, na que a xente moza sodes inmensa maioría”, destacou, “unha mocidade que está cansa de ver como se lles rouba o futuro pese a ser a xeración máis formada da historia”. “Por iso estou convencida de a xuventude vai ser o principal motor de cambio que este concello necesita para abrir un tempo novo de futuro e de esperanza, un tempo novo da man do BNG e desta candidatura de xente moza que sae a por todas o 28M”, resaltou.

A líder do Bloque recalcou que a candidatura que encabeza Carolina supón un BNG con forzas renovadas, “porque temos equipo e proxecto para transformar Laracha en positivo, como xa fixemos nos concellos que gobernamos, e aí tendes o exemplo de Carballo”. Neste sentido, Pontón puxo en valor o modelo municipal de éxito do Bloque, de gobernos de calidade, solventes, que saben xestionar con eficacia cada euro, gobernos que melloran a vida das persoas, convertendo vilas e cidades en modelos de bo facer, referentes en todo o País. “Isto é o que estamos facendo nos concellos nos que gobernamos e é o que queremos facer tamén en Laracha”, subliñou.