A Laracha presenta un Nadal de propostas culturais, conciliación e apoio ao comercio local

O Concello da Laracha presentou onte a completa programación municipal para este Nadal nunha proposta integral e coordinada entre os diferentes departamentos que combina cultura, deporte, conciliación e apoio ao comercio local. Foi a cargo do alcalde, José Manuel López Varela, e as concelleiras Patricia Bello (Cultura e Deportes) e Rocío López (Servizos Sociais e Promoción Económica), xunto ás técnicas municipais implicadas na organización das diversas iniciativas.

O Nadal da Laracha botará a andar oficialmente o venres da semana que vén, día 5 de decembro, co tradicional acendido da iluminación que se celebrará ás 18:30 horas nas prazas Les Sables d’Olonne e O Recreo.

A partir dese momento desenvolverase unha ampla e variada programación pensada para todos os públicos, con especial atención á infancia e á mocidade, con estas propostas destacadas:

• Obradoiro de cociña Panettones con maxia, con sesións para Educación Infantil e Primaria os días 22 e 29 de decembro. A inscrición será gratuíta e poderá formalizarse desde o 15 de decembro.
• Peque Disco Moc Moc, espectáculo de MeRe Clown o martes 23 de decembro no Centro Sociocultural Paiosaco.
• Visita de Papá Noel á Praza O Recreo o 23 de decembro en horario de mañá e tarde.
• Teatro familiar: Os contos do Lobicán, de Redrum Teatro, o venres 26 na Casa da Cultura.
• Patinaxe sobre xeo para mocidade de 12 a 18 anos o luns 29 de decembro, con saída desde a praza Les Sables d’Olonne cara á pista da República (Perillo).
• Espectáculo musical: Melodías en familia, de The Music Patrol, o martes 30 no Centro Sociocomunitario de Caión.
• Gala de maxia: Abraio, de Dani García, o venres 2 de xaneiro na Casa da Cultura.
• Contacontos para bebés: Cu-cú, tas-tás, de Barriga Verde, o sábado 3 de xaneiro no Baixo da Biblioteca.
• Cabalgata dos Reis Magos, os días 4 e 5 de xaneiro, percorrendo as trece parroquias do municipio.

Parte destas propostas son organizadas en colaboración co programa Dinamiz-ARTj do Instituto Para la Transición Justa.

A programación cultural de Nadal complétase cos catro concursos de Panxoliñas (20 de decembro, dirixido ás asociacións culturais e coros parroquiais), Escaparates (para os comercios), Postais (alumnado dos colexios) e decoración de fachadas, balcóns e xardíns particulares.

Agasalla comercio local, ten premio: 37 negocios adheridos e inicio do reparto a próxima semana

A nova edición de Agasalla comercio local, ten premio regresa co triplo obxectivo de sensibilizar sobre a importancia do comercio de proximidade, fidelizar á clientela e subvencionar as compras da cidadanía. 

Este ano participan 37 establecementos e servizos locais. A partir do venres da próxima semana, os comercios adheridos comezarán a repartir as 15.000 tarxetas rasca e gaña entre a súa clientela ata o 5 de xaneiro ou ata esgotar existencias. Nelas poderanse obter premios directos consistentes en bonos de 10 euros para empregar en calquera dos negocios participantes, así como os agasallos que os propios establecementos achegaron voluntariamente (poden consultarse na web do programa, https://nadal.alaracha.gal/). As tarxetas non premiadas terán unha segunda oportunidade: poderán depositarse nas urnas habilitadas nas bibliotecas da Laracha, Paiosaco e Caión para entrar no sorteo final de agasallos (experiencia cultural, turística e gastronómica).

Programa Harmoniza: conciliación durante as vacacións escolares

Ata o 14 de decembro permanecerá aberta a inscrición no Programa Harmoniza: Conciliando na Laracha durante o Nadal, iniciativa destinada a facilitar a conciliación da vida laboral, persoal e familiar durante as vacacións nos centros educativos.

O servizo, dirixido a nenos e nenas de 3 a 12 anos, funcionará de luns a venres (excepto festivos) entre as 7:00 e as 14:15 horas nas instalacións do CEIP Otero Pedrayo.