Piden a rebaixa do servizo de madrugadores dos coles da Laracha

O PSdeG-PSOE da Laracha reclama ao Concello que os prezos do Servizo de Madrugadores nos centros educativos do municipio volvan ser os do curso pasado, logo da subida aprobada no mes de maio.
Seguundo o PSOE, as porcentaxes de subida varían entre un 22,38% e un 97,84% dependendo do centro. O servizo de mes completo con almorzo subiu 21,80€ nos CEIP de Caión e Otero Pedrayo, e 27,52€ no caso do CEIP Alfredo Brañas, quedando unha tarifa mensual para os tres centros de 65,00€.

“O Grupo Municipal Socialista manifestouse dende un primeiro momento contrario a esta suba e foi o único grupo que votou en contra cando esta foi incluída na modificación do Plan Harmoniza no pleno do mes de abril”, explica a voceira socialista local Inés Ramos López.

O Plan Harmoniza de conciliación familiar na Laracha inclúe tanto o servizo de madrugadores, dispoñible durante o curso escolar antes da entrada a clase, como o servizo de vacacións.