O Consello Parroquial de Oza, un exemplo da participación cidadá na política municipal

Absolutamente consolidados están os Consellos Parroquias de Carballo. Esas citas, por cada unha das 16 parroquias, para que os veciñ@s falen cara a cara cos responsables municipais das necesidades dos seus lugares. Así se puido comprobar no Consello Parroquial de Oza celebrado onte, no que máis de 40 veciñ@s participaron activamente, e que contou ademais ca presencia dos representates dos grupos municipais: Evencio Ferrero do BNG; Paula Nogueira, do PP; Mari Carmen Vila, do PSOE, e José Bello, de TeGa.

Unha veciñanza que ía coas ideas ben claras: Esixen a extensión do abastecemento de auga a todos os lugares da parroquia.
Unha necesidade básica que practicamente quedará solventada, segundo informou o alcalde Evencio Ferrero, co proxecto que está en execución nestes momentos para levar o servizo ata Razo. Ademais, de cara aos orzamentos do ano que vén está previsto incluír a ampliación ata Serantes, de onde eran boa parte dos veciños e veciñas presentes no consello, e dende ese punto ata Xoane (Goiáns). O proxecto estará listo este mesmo mes, á espera de elaborar outro para completar a parroquia co lugar de Villar de Uz.

Orzamentos participativos

A cita serviu para repasar a idea dos orzamentos participativos, e a meirande parte dos grupos propoñen un sistema mixto, seguindo os modelos destes Consellos parroquiais, recollendo as suxestións veciñais e trasladalas, na medida do posible, aos orzamentos. Algo que practicamente xa é unha realidade, pois a a pavimentación do campo da festa de Oza foi unha demanda do ano pasado que se afrontará antes do verán a través do superávit do orzamento do ano pasado.

Seguridade

A outra gran preocupación da veciñanza de Oza é a seguridade viaria na estrada Carballo-Razo, polo que van seguir pedindo modificar os pasos de peóns para alonxalos das curvas e a instalación de lombos para reducir a velocidade, así como a construción de beirarrúas.