Os veciños do Pindo manifestaranse polo seu saneamento
Son máis de 20 anos de espera e a veciñanza do Pindo non pode máis. O problema da falta de saneamento no centro do Pindo non se soluciona cunhas chuvias (si que mitigan o cheiro), e cómpre pasar a acción. Xa fixeron unha performance e mesmo contrataron unha analítica para chamar a atención das administracións. Pero as promesas van caendo polo seu propio peso.
A solución, o novo colector que a Xunta está desenvolvendo dende o Ézaro ata a depuradora de Panchés, tiña que levar anos en funcionamento. Nos últimos meses a Xunta veulle asegurando ao alcalde carnotán que a obra esta a piques de ser entregada pero xa pasou outubro, xa pasou novembro e a día de hoxe os veciños non teñen notificación ningunha nin por parte da Xunta nin por parte dun alcalde que amosou publicamente o apoio a todos os veciños en numerosas ocasións.
Os veciños, coa axuda ademais da activa Asociación Pedramar, están pensando en levar o asunto ao Parlamento a través do voceiro do PSOE local, Suso Campos.
Pero non será a única acción. A máis importante xa está convocada. Este vindeiro sábado 23 de decembro farán unha manifestación no Pindo na que esperan que participe todo o pobo e xente dos arredores. A saída será ás 17:00h dende a praza da Solaina facendo un percorrido ata o porto do Sinal e volta.
Novas relacionadas
- 18-11-19: O Pindo segue pendente do saneamento e da reconstrución dun mallado paseo marítimo.
- 10-10-17: Unha analítica das augas residuais do Pindo demostran a necesidade de acometer o novo saneamento.
- 18-09-17: Co cú ao aire fronte a falta de saneamento no Pindo.
- 04-09-17: O Pindo mobilízase contra os cheiros.
Fonte
- Redacción de QPC (info@quepasanacosta.com).