Andaina PSM quere falar sobre o suicidio
No mundo do xornalismo un deses “totems” herdados dos tempos máis rancios da democracia, di que non é convinte falar do suicidio. A excusa do mal chamado “efecto chamada” o único que consegue é que a sociedade non aborde un dos seus problemas máis importantes.
As cifras son claras: Galicia rexistra o triple de mortes por suicidio que en accidentes de tráfico. Falamos de máis de 300 mortes por suicidio o ano pasado en Galicia (son 1.500 as mortes por COVID durante 2020), o que supón unha taxa de 13,11 suicidios por cada 100.000 habitantes, fronte ao 7,79% nacional e o 11,93% europeo. Son .
As entidades especializadas en saúde mental avogan por afrontar unha “abordaxe transversal” da problemática para mitigar os seus efectos, e traballar na “prevención, detección, diagnóstico, tratamento e continuidade de coidados dos problemas de saúde mental, así como na visibilización desta realidade que está tan oculta na sociedade”.
Unha das entidades que así o entende é Andaina PSM (Pro Saúde Mental). Actualmente traballan nas comarcas de Ordes e Ulla-Sar, pero dúas das súas profesionais son da Costa da Morte e cren que sería necesario ir achegándose á comarca para tratar máis profundamente un problema histórico dunha zona históricamente illada como a nosa.
Cristina Canosa (Cee) e Verónica Verdía (A Laracha) desenvolven un programa de prevención do suicidio nas comarcas de Ordes e Ulla-Sar. O programa, por un lado pretende mellorar o coñecemento da poboación xeral e das e dos profesionais sociosanitarios sobre a conduta suicida e a súa prevención. “A primeira liña de traballo consiste en infomar e asesorar a persoas e grupos en risco, ofrecendo soporte e acompañamento na abordaxe da conduta suicida e facendo as pertinentes derivacións a dispositivos especializados”, explican.
A idea é “capacitar ás profesionais sociosanitarios/as en materia de prevención do suicidio”. E para iso realizan diversas formacións con persoal dos centros de saúde e servizos sociais de ambas comarcas, así como con alumnado universitario dos ámbitos nomeados.
Outra liña de traballo inclúe “actuacións dirixidas á poboación xeral, coa finalidade de contribuír á redución do tabú en torno ao suicidio, visibilizar esta problemática e proporcionar información sobre a prevención da conduta suicida”. Para iso organizan mesas informativas, que ubican en lugares como o Centro de Saúde, o CIM… coas que se pretende achegar á cidadanía coñecementos e recursos para unha mellor abordaxe da conduta suicida, a través de material informativo e de difusión.
Esperamos pois, que as entidades costeiras vaia atraendo estes necesarios programas.
Novas relacionadas
- Luís Cores, de APEM: "Cando intentei suicidarme a xente non fixo nada, pensan que ao final non o vas a facer”.
- Galicia senta a falar do suicidio.