A Sociedade Galega Sementeira celebrou un bergantiñán Día das Letras Galegas en Basilea
A pasada fin de semana, a cidade suíza de Basilea foi escenario dunha emotiva celebración do Día daás Letras Galegas, organizada pola Sociedade Galega Sementeira. Esta entidade, profundamente arraigada entre a diáspora galega en Suíza e cun notable número de socios orixinarios da comarca de Bergantiños, volveu demostrar o seu compromiso coa cultura e a lingua galega a través dun evento que congregou a un público entusiasta.
De feito, a Sociedade Galega Sementeira está presidida polo carballés Ramón Carreira, consolidouse como un verdadeiro bastión da galeguidade no exterior. Carreira, coñecido polo seu firme compromiso con Galicia e coa lingua galega, converteu a Sementeira nun punto de encontro para quen, desde o corazón de Europa, seguen latexando ao ritmo das raíces identitarias. Con actos como este, o Día dás Letras Galegas proxéctase internacionalmente, unindo á diáspora ao redor da palabra, a música e a memoria colectiva.
O acto principal polo 17M da entidade foi unha conferencia ofrecida por Xosé Luís Rivas Cruz, máis coñecido como Mini, figura imprescindible do panorama cultural galego. Profesor, cantautor, musicólogo e político, Mini fixo un percorrido pola música tradicional galega, con especial atención á música da aldea. A través do canto, logrou entrelazar con gran acerto e detalle a música coa identidade cultural do pobo galego. A súa intervención non só foi unha exposición musical senón tamén unha reflexión profunda sobre as raíces, os sons e as emocións que definen a tradición e a memoria colectiva de Galicia. “Paréceme ben que este ano concedeuse o Día das Letras Galegas ás Cantareiras. Con todo, creo que sería máis acertado dedicalo ao patrimonio oral no seu conxunto. Isto permitiría unha visión máis ampla e representativa da nosa cultura. Dentro dese patrimonio oral, por suposto, poderiamos destacar ás cantareiras, que teñen un papel fundamental na música tradicional galega, especialmente no que respecta ao baile e a festa. Pero centrarse unicamente nelas deixa fóra unha parte esencial da nosa memoria colectiva como os cantares de berce que as nais entoaban aos seus fillos, os romances transmitidos polas nosas avoas e veciñas e tantas outras manifestacións do folclore que forman parte da nosa identidade. Non pretendo criticar nin cuestionar a elección porque as pandereteiras de Mens e tantas outras mulleres anónimas que houbo por toda Galicia merecen, sen dúbida, esta gran homenaxe. Só desexo que, no futuro, téñase en conta a riqueza e diversidade de todo o noso patrimonio oral, que é tan valioso como as voces que o encarnaron” declarou Rivas Cruz, que comezou a súa carreira como mestre rural en 1972, mantivo unha vida dedicada á cultura galega.
Fundador dos emblemáticos grupos Fuxan vos Ventos e A Quenlla, con máis dunha decena de discos no seu haber, foi un incansable recopilador, adaptador e difusor do patrimonio musical de Galicia. No ámbito político, foi alcalde de Boimorto e deputado no Parlamento de Galicia polo BNG ata 2024, combinando sempre a acción institucional co seu labor cultural.
Mini vén de participar no Festiletras 2025, o gran festival das letras que se realiza na Costa da Morte, concretamente na aldea pontecesán do Couto. Un evento ao que asistiu en múltiples ocasións e que considera "a continuidade dun bo traballo realizado durante moitos anos a favor da lingua e a cultura galega". Cunha traxectoria marcada polo seu compromiso co patrimonio musical e lingüístico de Galicia, Rivas lembrou tamén as súas visitas previas ao Couto, destacando como o festival evolucionou ata converterse en "un gran evento que se sae de todo o que el coñecía". Na edición de 2024, participou cantando xunto ao seu grupo Catro nun Zoco, achegando a súa enerxía á programación musical. Este ano, a súa presenza tomou un xiro máis reflexivo, ao intervir nunha conferencia centrada nas cantareiras e a música tradicional galega, reafirmando así o seu papel como divulgador e defensor das raíces culturais de Galicia. Non é alleo a Suíza. Visitou o país en varias ocasións, actuando en cidades como Lausana, Xenebra e Zúric. As súas presentacións adoptaron distintos formatos, case sempre no marco de celebracións relacionadas coas Letras Galegas. Estas iniciativas, impulsadas por asociacións da diáspora, son vistas por Mini como fundamentais para fortalecer os lazos entre Galicia e os galegos e galegas que viven no exterior. Cada experiencia foi profundamente enriquecedora e esta última visita non foi a excepción.
Mini advirte sobre o futuro do galego: “Vivimos momentos difíciles, pero aínda hai esperanza” Xosé Luís Rivas Cruz expresou a súa preocupación pola situación actual do idioma galego, destacando que falar sobre o seu futuro “é moi complicado” debido ás circunstancias adversas que o rodean. “Estamos a atravesar momentos difíciles, non só porque se está actuando en contra do idioma, senón porque os medios de comunicación e a evolución da sociedade están na nosa contra”, afirmou. A pesar do panorama desalentador, non perde a esperanza e subliña que é posible reverter esta situación con vontade política. “Creo que a única maneira de cambiar esta realidade é con políticas a favor do galego”, sinalou.
Como exemplo inspirador, mencionou o caso do País Vasco: “Alí só o 10% da poboación falaba eúscaro e hoxe en día alcanzouse case un 25% grazas a un compromiso firme coa lingua”. Con estas palabras, Mini fai un chamado á acción para protexer e revitalizar o galego, demostrando que con decisión e políticas adecuadas, un futuro máis esperanzador para a lingua é posible. Tras a intervención de Mini, os asistentes puideron gozar dun concerto no que destacou a actuación do grupo anfitrión, Semente, cuxo repertorio de música tradicional puxo o broche de ouro a unha xornada marcada pola emoción, o recordo e a reafirmación da identidade galega máis aló das súas fronteiras.
Máis novas de Alejandra Plaza