A Xunta asegura que xa está a traballar na licitación do proxecto construtivo da prolongación da AG-55 ata Berdoias

Cando xa se albiscan os primeiros, tímidos, movementos na zona de Santa Irene das obras do novo treito de Corredor ata Vimianzo, dende o BNG piden xa comezar aos trámites do proxecto da segunda fase de prolongación da AG-55, entre a AC-432, en Calo (Vimianzo), e o cruce de  Berdoias. Lembran que os movementos de terras que levan feitos máis dunha década, e que os trámites se poden realizar ao mesmo tempo que se executa o treito ata a AC-432, a estrada que une Vimianzo e Camariñas.

 

Así llo sinalou o deputado Oscar Insua na na Comisión 2ª de Ordenación Territorial, Obras Públicas, Medio Ambiente e Servizos do Parlamento galego, á directora da Axencia Galega de Infraestruturas (AXI), María Deza Martínez, que sinalou que a Xunta está a traballar na licitación do proxecto construtivo da segunda fase de ampliación da autovía.

Oscar Insua lembrou que “pasaron máis de 20 anos desde que o PP anunciou o Plan Galicia logo da catástrofe do Prestige, e segue incumprindo os seus propios compromisos; os agravios á nosa comarca son máis que evidentes”. O deputado tamén criticou que “o Plan MOVE, que foi impulsado en 2010 polo Partido Popular na Xunta, está sen executar logo de 16 anos; aparte da ampliación ata Berdoias, falta a conexión ata Cee e o porto de Brens”.