O teatro invade a #AxendaCostadaMorte

O teatro volve a ser, unha fin de semana máis, o protagonista da #axenda da Costa da Morte. Dende hoxe e ata o domingo haberá citas para todos os gustos e para todos os públicos en varias localidades da zona. Antes de ver máis detalladamente cada unha das citas, vemos o parte costeiro de 4gotas. Hoxe aínda teremos ventos de componente sur que deixarán chuvias na mañá no litoral oeste e no interior. Durante a tarde pode chover en calquera punto da Costa da Morte. Mañá sábado comeza a achegarse un anticiclón, pero este situarase moi ao norte e achegará aire moi frío. Soprará vento do norte moderado con refachos fortes durante o sábado e achegará chuvias. Serán intermitentes, pero durante a mañá e o mediodía, especialmente, algún deses chaparróns será intenso e mesmo acompañado de saraiba. Na tarde do sábado estes chaparróns serán moi aillados. Pero durante todo o día irá frío. Durante o domingo calmarase o vento e non irá tanto frío (pero non pasaremos dos 16-17ºC) e haberá bastantes momentos de sol. Iso si, tamén haberá chaparróns puntuais bastante espallados no tempo. Así que, xa vemos que podemos dicir que pasamos de estar no verán no final de outubro, ao outono o xoves e venres, ao inverno durante o sábado.

Teatro

• Teatro en Malpica. Malasombra Produccións trae hoxe ao centro Cívico de Malpica a súa obra "Os Rockenstein" dentro da Mostra de Teatro argallada polo concello e que vai xa pola súa trece edición.
• Teatro en Muros. O centro cultural de Muros acolle esta noite, ás 21:30 horas, o espectáculo "Un tonto en una caja".
• Teatro en Muxía. A compañía Fantoches Baj interpreta a obra "Os vellos non deben namorarse". A cita comeza ás 19:30 horas no salón de actos e está dirixida a todos os públicos.
• Teatro en Vimianzo. Mañá á noite volve o teatro á Casa da Cultura de Vimianzo dentro da programación cultural posta en marcha polo concello. Será o turno de Talía Teatro que vén coa súa obra "Ubú Rei". O espectáculo comeza ás 21:30 horas e o custo da entrada é de 5€  (2,5€ para estudantes e xubilados).
• Monólogo en Camariñas. Carlos Blanco actúa mañá, ás 21:30 horas, na casa de Pedra de Camariñas. O prezo da entrada é de 3€.
• Teatro en Ponteceso. A compañía A Panadaría trae mañá sábado, ás 22:30 horas, a súa obra "Pan pan" ao salón de actos do edificio das Escolas de Ponteceso. A cita emárcase dentro do XXIV ciclo de teatro organizado polo concello. A entrada é de balde e hai reservala previamente na tesourería municipal.
• Teatro infantil en Vimianzo. Os máis pequenos desfrutarán este domingo dunha historia de aventuras diferente, O sal do mar, interpretada por Teatro del Andamio. A cita comeza ás 18 horas na casa da cultura vimiancesa e a entrada é de balde.

Outras citas

• Homenaxe a Paco Souto. Esta fin de semana continúan en Malpica o programa "Novas crónicas de Malpica" que se enmcarca dentro do certame de poesía erótica Illas Sisargas e co o concello de Malpica e a asociación Caldeirón homenaxea a Paco Souto.
• Recital de Manolín. Hoxe, ás 20:15 horas, terá lugar na aula de conferencias da Casa da Cultura de Cee o 3º recital do ciclo “Sentimentos” de Manuel Oliveira, Manolín.
• Fin de semana cultural no RockCorner Bar de Cee, cun concerto para a noite do venres, e un recital poético costeiro para a do sábado.
• Charla arqueolóxica en Laxe. O Museo do Mar de Laxe acolle hoxe, ás 19 horas, unha conferencia que leva por título "A excavación arqueolóxica de Castrelo, situación actual e perspectivas de futuro" impartida pola arqueóloga co Castro de Castrelo, Carmen Álvarez. A actividade enmárcase dentro do programa Reláxese.
• Tamén dentro do programa Reláxese, mañá sábado haberá un taller de cociña ecolóxica impartido por Noa Vázquez e, como todos os sábados do mes de novembro, o mercado municipal acolle un mercado ecolóxico.
• Xornadas micolóxicas en Cee. A casa da cultura de Cee acolle esta fin de semana as XVII xornadas micolóxicas da Costa da Morte organizada pola asociación micolóxica Pan de Raposo.
• Magosto en Serantes. Os veciños desta parroquia laxense celebran mañá o seu tradicional magosto no local dos veciños. A festa comeza ás oito da tarde.
• Obradoiro de Regueifa: A Casa dos Veciños acolle na tarde do sábado un obradoiro de regueifa coa brava Lupe Blanco.
• XI Xuntanza de Palilleiras en Vimianzo. Unhas 550 palilleiras de toda a comunidade cítanse mañá, a partir das 10 horas, no pavillón da vila para demostrar os seus traballos e compartir experiencias.
• Arte na Rúa. Dende hoxe e ata o domingo a praza do concello de Carballo transfórmase nun escenario para acoller o ciclo "Somos rúa. Facemos arte". Os espectáculos  - coordinados por Paula Cabaleiro - desenvolveranse durante a mañá e a tarde.

Exposicións

• Castelo de Vimianzo. A fortaleza así como a súa mostra de artesanía ao vivo pódese visitar martes a domingo de 10:30 a 14 e de 16 a 19 horas. Visitas guiadas gratuítas: sábado e domingo ás 12 e ás 19 horas.
• Conxunto etnográfico do Mosquetín. O conxunto de muíños e batáns do Mosquetín abre as súas portas todos os días da semana dende as 11 horas ata ás 18 horas. Os sábados e os domingos hai visita guiada ás 13 e ás 18 horas.
• As Torres do Allo, en Zas, abre sábados e domingos e festivos  (de 11 a 19 horas). Ademais, o pazo acolle unha mostra de pezas de Olería de Buño e ofrece visitas guiadas gratuitas ás 13 e ás 17 horas.
• No dolmen de Dombate ofrécense visitas guiadas todos os días de 10:30 a 14 e de 16 a 18:30 horas.

Sendeirismo

• Outono en marcha. A asociación ambiental Senda Nova pon en marcha o outono cun roteiro de sendeirismo pola Laracha que leva por título "A senda das Capelas". A andaina é o domingo pola mañá.

 Concertos

• Halloween Rock en Laxe. A Ventana de Laxe vive esta noite un "halloween" cargado de rock.
• Punkrock en Louro. Abanda SoZios a la FuerZa / Tributo a La Polla Records ofrece un concerto mañá no pub Muíiño de Louro, en Muros.
• Rock&Blues en Vimianzo. O Celme Café de Vimianzo acolle mañá un concerto de rock&blues a cargo de Carlos Campoy&Tequila Road. A cita comeza a media noite.

Fonte

• Redacción QPC (info@quepasanacosta.com)