O Oso Polar Costa da Morte pecha o plantel con dúas novas incorporacións

Trala decisión da directiva do ACB Costa da Morte de optar por un dúo de adestradores da casa (Roberto Soliño e Manuel Busto) para dirixir ao equipo senior masculino na súa primeira tempada na Liga FGB empezouse a perfilar o persoal de cara á próxima tempada. Para ambos os técnicos era fundamental reforzar as posicións de base e pivote. Unha vez confirmada a volta ás canchas do veterano pivote José María Pais Rodríguez o corpo técnico dá por pechado o xogo interior salvo novidades de última hora.

Novas incorporacións

O equipo perdeu respecto da pasada tempada a dous xogadores (Luís por traballo e Félix por estudos) que ocupaban as posicións de escolta e alero respectivamente. Así pois para compensar ditas baixas incorporáronse Noel e Deril. Noel é un alero moi forte con gran presenza física que destaca polos seus bos movementos no poste baixo e a súa dura defensa axudando moito no rebote aos xogadores interiores. Pola súa banda Deril é un escolta moi rápido con moita mobilidade e facilidade para anotar en transición dado que corre moi ben o contraataque. Con estas dúas fichaxes conséguense compensar as baixas de Luís e Félix pero segue sen pecharse a fichaxe do tan ansiado base que complemente a Javi e Manuel na dirección do equipo. Á marxe destas fichaxes confírmase a incorporación ao primeiro equipo de varios xogadores da canteira que a pasada tempada formaban parte do equipo junior masculino: Fabián (base) e Andrés (escolta).

Plantel 2010 / 2011

A expensas dalgunha fichaxe de última hora a composición do persoal de cara á próxima tempada é a seguinte:

• Bases: Javi, Manuel e Fabián.
• Escoltas: José, Busto, Deril e Andrés.
• Aleros: Santi, Roberto e Noel.
• Ala-Pivot: José Ramón e David.
• Pivote: Iván e Pais.

Intensa preparación

Por outra banda o persoal continúa os adestramentos de pretemporada que se centrarán no traballo físico con vistas a alcanzar o nivel óptimo para o duro inicio de liga que lles espera ao ter que enfrontarse nas dúas primeiras xornadas ao Celtas de Foz e ao C.B. Atocha que pasan por ser os dous grandes favoritos no grupo Norte da Liga FGB.

Máis información

• acbcostadamorte.skyrock.com.

Novas relacionadas

• Dúo de adestradores para dirixir ao Oso Polar.
• O Oso Polar xa quence motores para o reto da Liga Sénior.

Fonte

• Nota de prensa do ACB Costa da Morte.