”Non sei se foi a lúa, as Estrellas (Galicia), ou ese orgullo que só poden sentir os que vivimos na aldea, pero esa noite puxemos en marcha as festas de Traba"
Unha das citas da completa Axenda desta fin de semana na Costa da Morte é a Romaría dos Milagros de Traba. Unha cita que estivo a piques de non celebrarse este ano de non ser pola nova comisión de festas.
Todo xurdiu un días previos ao Sacramento, e como non podía ser doutra maneira, nun bar, un grupo de veciños con moito cariño a esta vila, que os viu medrar, laiábanse de que non se fora celebrar esta festa. ”Non sei se foi a lúa, as Estrellas (Galicia), ou ese orgullo que só poden sentir os que vivimos na aldea, pero esa noite quixemos poñernos en marcha para dar unhas festas a Traba e, por suposto, algo do que falar”, explica Silvia Parada.
Coa luz do día xa comprobaron que as cousas requiren do seu tempo e aínda que xa tiñan todo en mente, había que telo en papeles polo que non chegaron a celebrar as cacholas. Pero si lles deu tempo para comezar a traballar para as grandes festas da vila: A Romaría dos Milagros.
Así foi como Diego Mouzo, José Carlos Figueiras e Javier Trillo formaron a Asociación Cuarto Domingo de Agosto, e tras moito traballo como a nova Comisión de Festas de Traba de Laxe, conseguiron opresentar un completo programa para este domingo 24 e o luns 25 de agosto.
Xa dende o 15 e ata o 23 de agosto ás 19:00 h soan as Misas da Novena na honra de Nosa Señora dos Milagres.
O mesmo domingo 24 de agosto de 2025, As festas de Traba, concello de Laxe, comezan con misas cada hora a partir das 9:00 h na honra de Nosa Señora dos Milagres.
Ás 13:30 h, terá lugar a misa solemne e procesión de Nosa Señora dos Milagres. Despois dos oficios relixiosos, gozarán da banda de gaitas Churia, e comezará a sesión vermú coa orquestra Escaparate, que tamén animará a verbena da noite coa orquestra Compostela.
Para o luns 25 de agosto de 2025, ás 13:00 h, celebrarase a misa solemne na honra de San Xosé. Despois, desfrutaremos da banda de gaitas.
O dúo DeFesta, dos veciños de Laxe, será o encargado de facer bailar e desfrutar tanto da sesión vermú como da festa nocturna.