Nace o "Muxía Itinerante", un programa para levar a cultura ás parroquias

O Concello de Muxía vén de poñer en marcha Muxía Itinerante 2025, unha iniciativa pioneira que leva por primeira vez actividades culturais, deportivas e de lecer ás distintas parroquias do municipio. O obxectivo é descentralizar a programación municipal e fomentar a participación veciñal en espazos onde, ata o de agora, non se realizaban eventos deste tipo.

As parroquias de O Castro, Quintáns, Senande, Touriñán e Nemiña acollerán durante o verán diferentes propostas que combinan natureza, música, humor, astronomía e actividades para todos os públicos. Tal e como destaca a tenente de alcalde, Sandra Vilela, “é a primeira vez que se fai algo así en Muxía, e facémolo coa ilusión de achegar a cultura ás parroquias, recoñecendo o seu valor e dinamizando a vida comunitaria”.