Pondal PonteBen

Que Eduardo Pondal foi un magnífico estudante de Medicina e acadou a licenciatura con excelente nota nesta especialidade na Universidade de Santiago non é algo que pase desapercibido na comarca. A verdade é que exerceu escasamente a súa profesión na armada tras aprobar unhas oposicións en Madrid, pero logo dedicouse máis á poesía, a pesar de que a Medicina e os consellos saudables formaron parte da súa vida, como o corrobora os consellos médicos que enviaba por carta ós seus correspondentes, entre eles a súa irmá Josefa (Pepita Pondal), como na carta que se reproduce embaixo. Con todo, a Fundación Eduardo Pondal, fiel ás múltiples facianas que presenta o escritor de Ponteceso, pon en marcha un programa de saúde baixo o título PonteBEN!! no que intentaremos achegar á cidadanía uns consellos médicos que lles sirvar para gozar mellor da vida. Para iso, buscamos a colaboración de La Caixa, quen patrocina este programa saudable, e de diversas empresas municipais, as cales colaboran cos seus medios, experiencias e sabedoría. Artellouse un ambicioso programa no que, durante catro días de decembro, calquera persoa poida realizar unha audición audiométrica, tomar uns tés suadables, realizar exercicio físico reparador, escoitar consellos que mellorarán de modo xeral a súa saúde ou levar para a casa mostras de produtos. Para participar neste programa convén inscribirse. O rexistro de inscricións lévao Patricia Bermúdez Bellón. Ademais de na Fundación, pódese encontrar o tríptico divulgativo nas entidades colaboradoras. O programa pecharase o domingo 19 cunha degustación de pinchos saudables.

Mércores saudable na Fundación Eduardo Pondal

O salón de actos da Casa do Cura (Fundación Eduardo Pondal) acollerá este mércores 8 de decembro, a partir das 5 da tarde, a segunda xornada do programa PonteBEN!! Nela colaborarán os establecementos Arnica II e óptica A Trabe a través das súas xerentes Fátima Bello Cerdeiro e Belén Bello Cerdeiro. Esta xornada saudable desenvolverase en dúas sesións: na primeira, as xerentes expoñerán ós 50 inscritos na mesma consellos para mellorar a súa calidade de vida desde os ámbitos da nutrición, vista e oído; na segunda, realizaranse revisións ópticas e audiométricas gratuítas. Ademais, todos os que pasen pola Fundación Eduardo Pondal recibirán como agasallo, por xentileza da farmacia de Ponteceso, a revista Consellos do farmacéutico.

Seguintes sesións

O programa PonteBEN!! continuará nas tardes dos vindeiros domingos 12 e 19 de decembro nas que se desenvolverán accións divulgativas en parafarmacia, odontoloxía, actividade física e gastronomía saudable. O domingo 12, recuperarase a suspendida xornada inicial.

Carta de Eduardo Pondal a Josefa Pondal

[A Coruña, 14 de xuño de 1.898.] [..] Polo que toca a esa pequena inchazón, que dis tes na empeña e principio da perna, é cousa insignificante e de pouca importancia.Iso é un simple edema, que adoitan padecer moitas mulleres que saen pouco, e non é síntoma de afección seria [...] A miña opinión é que debes lavar as pernas e os pés de cando en cando cun cocemento de follas e leves talos frescos das plantas seguintes, que hai nesa horta: de romeu, de herba abelleira (ou melisa), de herba luísa (ou artemisa). De todo isto, unha boa presa cocida en auga. Úsaa levemente morna. Pon sobre o inchazo un trapiño empapado nesa auga e usa encima unha media algo cinxida para comprimir. Podes beber todas as mañás un cuarteirón de auga de Mondariz ou de cervexa, que che mandarei se queres. Das dúas, a que máis che guste. Isto e tomar de cando en cando na horta o paseo por fóra ó aire libre serache bo, moi bo. Toma un bo vasiño de leite con cada chocolate e fai exercicio moderado. Sen máis por hoxe, desexa que sigas ben este teu moi afectuoso irmán Eduardo.

Fonte

• Nota de prensa da Fundación Eduardo Pondal da man de Xosé Manuel Varela.