O Auditorio de Vimianzo convértese nun estudo de radio para celebrar o 30 aniversario de Ponte... nas Ondas!

O Auditorio de Vimianzo converteuse este mércores 26 de marzo, nun dos puntos de emisión da maratón radiofónica que a Asociación Cultural e Pedagóxica  ‘Ponte... nas Ondas’ organizou para celebrar o seu 30 aniversario. Os outros foron Santiago de Compostela, Lugo, Pontevedra, Ourense, Vigo, Valença do Minho e Lisboa.

Desde a Casa da Cultura vimiancesa, o alumnado de 14 centros educativos da Costa da Morte demostrou o seu coñecemento sobre o patrimonio cultural e inmaterial durante sete horas de directo.

A música popular e tradicional e os oficios artesanais foron os grandes protagonistas dun evento que achegou o mundo radiofónico aos máis pequenos e pequenas dunha maneira moi especial, con entrevistas, actuacións musicais, diálogos, contos, etc.

Participaron:

• IES Maximino Romero co programa ‘Teatro lido de Labarta. Pose no seu centenario’.
• CPI As Revoltas co programa ‘A música en Cabana’.
• CEIP Labarta Pose co programa ‘O mundo rural’.
• CEIP Vila de Cee co programa ‘A escritura e a lingua galega’.
• CEIP Milladoiro co programa ‘Pandereteiras de Malpica’.
• IES Eduardo Pondal co programa ‘A máquina do tempo’.
• CEIP Praia de Quenxe co programa ‘O saber sabor da aldea’.
• CEIP Gándara-Sofán co programa ‘Patrimonio inmaterial de Verdillo’.
• CEIP As Forcadas co programa ‘Percebeiros e redeiras’.
• CEIP San Vicenzo co programa ‘Feminismo’.
• IES Pedra da Aguia co programa ‘O Encaixe’.
• CPI Cabo da Area co programa ‘Influencia científica de Isidro Parga Pongal’.
• CEIP de Dumbría co programa ‘Microtoponimia en Dumbría’.
• CPR N.S. do Carme co programa ‘O mar’.

Na xornada participaron tamén o director xeral de Centros e Recursos Humanos da Consellería de Educación, Jesús Manuel Álvarez Bértolo, a alcaldesa de Vimianzo, Mónica Rodríguez, e a concelleira de Cultura, Rosa Blanco, que destacou a importancia “de achegar a cultura aos máis pequenos e pequenas para que coñezan desde as idades máis temperás aqueles trazos que definen a nosa propia esencia” e, concluíu, “para nós é un orgullo poder ser parte deste encontro intercultural que se levou a cabo desde diferentes puntos de Galicia e norte de Portugal”.