Vimianzo presentou esta tarde a peza audiovisual 'As mulleres e o mar en Cereixo'

O Concello de Vimianzo vén de realizar a estrea mundial dun minidocumental realizado no marco do proxecto ‘Mareas. Senda a Muíño de Mareas de Cereixo e miradoiro do Furna do Sapo’, concedido polo GALP Costa da Morte.

'As mulleres e o mar en Cereixo' pon en valor o papel das mulleres historicamente ligadas ao mar nesta parroquia. En menos dun quilómetro de costa, esta forma de vida marcou a historia e a maneira de traballar de moitas mulleres, como destacaron a ADL do concello vimiancés, Rosa Sánchez, o xerente do GALP Guillermo González e a rexedora Mónica Rod.

Na peza, unha voz en off é a encargada de explicar como eran os seus oficios e a súa forma de vida. Logo son elas, as protagonistas, as encargadas de explicar como era o seu día a día indo mariscar, a vender os produtos recollidos, etc.

O obxectivo é poñer en valor as achegas das mulleres no rural, xa que as súas vidas, entrelazadas co mar, o muíño, o palillo, a terra e a familia son todo un exemplo de perseveranza.