Os Bombeiros sufocan dous incendios en vivendas da Laracha e Carballo

Tarde de sábado axitada para os Bombeiros de Carballo, que continúan inmersos, como os do resto de Galicia, no proceso de loita polos seus dereitos.
Eran as 18:00h cando se tiñan que desprazar á Avenida de Fisterra da laracha por mor dun aviso do 112 por un incendio nunha vivenda dun edificio plurifamiliar de 4 alturas. O alertante indica que chegou á vivenda e non puido entrar porque está chea de fume.

Os habitantes do edificio tiveron que saír á rúa, á excepción dos ocupantes dun dos baixo cuberta aos que se lle deu instruccións a través do CIAE 112 para que non saíran xa que o oco das escaleiras estaba cheo de fume. Os bombeiros accederon á vivenda, situada no 2º andar e localizaron o incendio no aparato lavavaixelas, realizando a extinción cun extintor de escuma. Os danos materiais centráronse no propio aparato e na madeira do moble da cociña que estaba máis próxima. O resto da cociña quedou danado por fume, pero non houbo persoas afectadas.

Pouco despois, arredor das 20:00h houbo un novo aviso dun veciño que vía saír fume por un incendio nun local dun edificio deshabitado situado na Rúa Muíño de Carballo. Os Bombeiros entraron e viron como estaban ardendo cartóns e plásticos. Empregaron 500 litros de auga en apagar o lume, cuxo orixe se descoñece, pois non había ninguén nos arredores.