Carballo leva a arte urbana ás escolas

Presentacion das novas ferramentas do Derrubando Muros con Pintura de Carballo Como facer medrar un proxecto tan singular como o de Derrubando Muros con Pintura? Que mellor que a través das escolas, convertindo a arte urbana nunha ferramenta educativa de primeira calidade. Esta é a nova campaña do Concello de Carballo, que gracias a esta iniciativa, dende 2013 está rexenerando ducias de rúas e convertindo desagradables muros de cemento en verdadeiros lenzos. O proxecto, que tivo continuidade co festival Rexenera Fest, e que fixo de tío maior para outras iniciativas semellantes da bisbarra como o Pintar na Rúa de Malpica ou o Muros do Nordés de Muxía, dá agora ao salto aos centros de ensino. Para iso prepararon dúas unidades didácticas para nenos e nenas de Primaria coa arela de achegar aos máis novos, a través dos centros de ensino, os graffitis creados na vila, un xeito de dar a coñecer o proxecto dunha forma transversal e divertida. A primeira titúlase Derrubamos dúbidas, dirixida a alumnado de 1º, 2º e 3º de Primaria; e a segunda titúlase Da prehistoria ao postgraffiti, para rapaces e rapazas de 4º, 5º e 6º de Primaria. As dúas están centradas no coñecemento dos conceptos básicos sobre arte urbana e ao desenvolvemento das habilidades artísticas e creativas do alumnado, tomando como referentes os artistas das obras que poden atoparse polas rúas de Carballo. Propoñen actividades dinámicas e que inclúen saídas para ver os murais. As unidades foron elaboradas por Galipat Servizos Culturais, empresa especializada en servizos de didáctica do patrimonio.

Nova web

O proxecto conta ademais cunha nova páxina web na que se recolle toda a información relativa aos murais, aos artistas e á localización de cada obra para poder dispoñer dos recursos a un só clic de distanza. Esta web ten o seu reflexo na sinalización interactiva de cada obra mediante paneis in situ dotados coas últimas tecnoloxías; e coa renovación do rueiro de arte urbana, no que aparecen recollidos todos os traballos, incluídos os da última edición do Rexenera Fest. Mapa interactivo dos graffitis Ademais, a través da web poderase realizar un percorrido guiado virtual, coma se fose a audiguía dun museo dos de toda a vida. En cada mural hai un panel informativo no que constan o título da obra, o autor, o ano de creación, unha numeración por orde cronolóxica de creación do mural e un Código QR con toda a información sobre a obra artística, incluíndo un texto explicativo e imaxes da obra.

Novas relacionadas

https://quepasanacosta.gal/carballo-suma-cinco-novas-obras-de-arte-a-sua-galeria-ao-aire-libre/

• 2018: Carballo segue loitando contra o feísmo na cuarta edición do pioneiro Rexenera Fest.
• 2017: O Rexenera Fest enche de cor as fachadas de Carballo
• Carballo Rexenera as súas rúas cun festival internacional de arte urbano
• As pintadas carballesas seguen derrubando muros.
• A documental que derruba muros con pintura.
• Paredes que modernizan.
• Graffitis que humanizan Carballo.
• Pintando muros para derribar barreiras.
• Os muros convírtense en Murais.