E o Presidente da Federación pasou polos campos da Costa
Este martes o presidente da Federación de Fútbol, Rafael Louzán, co que falabamos a semana pasada, realizou unha completa visita polos campos de fútbol da comarca, ratificando a súa intención de coñecelos de primeira man para proceder a mellorar as instalacións e mesmo pensar en poder realizar algún campionato de seleccións á zona.
”Quedamos gratamente sorprendidos pola calidade de moitas das instalacións como a de Esteiro, Louro, Dumbría… Ademais estivemos analizando a infraestrutura hoteleira da zona para estudar a posibilidade de traer un campionato de alto nivel, e creo que a medio curto prazo si se poderá”, asegurábanos onte pola tarde o presidente. Recoñeceu que pola orografía hai campos onde é difícil mellorar as instalacións como Muros ou Corcubión, pero “outros campos como Ara Solis, con esa afección, si que sería bo melloralos”.
Louzán, acompañado polo directivo Amancio Varela, o director deportivo Manu Fernández, e por Manolo Corredoira, xa oficialmente responsable federativo na Delegación da Costa (que por certo, se inaugura o vindeiro día 16), visitou os campos da Esteirana, Os Miúdos, Montelouro, Corcubión, Fisterra, Fisterra, Cee, Dumbría, Baio e Zas, e foi recibido polos seus presidentes.
”Viñemos ver e tamén a escoitar aos clubs, e se nos dixeron a verdade, a primeira impresión é boa. É impagable o traballo que eles fan e o cariño co que nos reciben. Pola mañá comprobamos o vén que traballan as xentes de Esteiro e Louro, e por exemplo o que fai o presidente dos Miúdos tamén a nivel ONG é espectacular, é un traballador nato”, contounos.
A realidade é que no Fútbol da Costa, só ver que un Presidente dunha entidade se deixa ver pola zona xa parece unha boa nova.
Visita especial a Fisterra
Tinte emotivo tivo a a visita a Fisterra dado o durísimo momento que vive o club ante a grave situación do seu presidente. A expedición da federación quixo dar ánimos aos directivos e que estes os trasladen á familia do presidente do club.
Presentación da Sede
Tamén visitaron Louzán e os seus acompañantes as instalacións da nova sede federativa da Costa en Baio. Unha sede que será oficiamente presentada o vindeiro luns 16 de xaneiro, onde ademaos se fará entrega do material da Federación aos clubs.
A Copa
Tremendamente interesado na Copa da Costa amósase Louzán, que repetiu que “imos volver, tamén pensando en sentarnos con todos os clubs e organizar a Copa ben organizada. Non só a dos maiores, tamén a da base”, apuntou.
Novas relacionadas
Fonte
- Redacción de QPC (info@quepasanacosta.com).