A revelación puxo patas arriba a Liga da Costa coa súa vitoria ante o Zas, que deixa colíder a un Fisterra que acabou por golear ao Baíñas; o panorama na cabeza deixa unha igualdade case total
Imaxe do Mazaricos-Zas-Foto-Wash Calvo
Xa non hai líder, senón líderes, nunha Liga da Costa que faría as delicias de calquera casa de apostas. Catro equipos en dous puntos e doce semanas espectaculares é o novo panorama, despois de que a revelación da competición, o Mazaricos, superase ao Sporting Zas. Algo ten o campo de Pino do Val que se lle fai enorme aos grandes. E non foi unha excepción, xa que os zascenses en ningún momento se adaptaron ao terreo de xogo. E ese resultado, a pesares de que beneficiaba a outro candidato ao título, correu como a pólvora a través dos smartphones en Ara Solis, onde foi moi celebrado. Vencendo ao Baíñas, o Fisterra se instalaba no coliderato. E pareceu entendelo moi cedo, porque deixou moi tocados aos vimianceses e compretou un partido de dez. Pero non só a cabeza se axusta (co San Lorenzo coma invitado silencioso), senón que a ameaza de arrastres parece terlle posto as pilas a tódolos equipos da zona baixa, e os resultados comezan a soar a urxencias. O Cabana e o Porteño se neutralizaron entre si, mentres que o Carnota sacou proveito da tranquilidade clasificatoria da Esteirana para sorprender de inicio.
Non menos axustada ven unha Primeira Autonómica na que case todo alegrías. De feito o Baio-Malpica era o único frente onde non podía haber ledicia total para os nosos. Os locais se impuxeron con xustiza e autoridade, nunha cita moi efectiva para sumar rumbo á salvación, e que aos malpicáns os deixa moi gravemente feridos. Lameuse precisamente os males o Soneira, que pasou por encima do Palmeira, mentres que Corme, Sofán e Outes confirmaron as boas sensacións dos últimos partidos para sumar a ritmo de goles.
A Preferente Autonómica ponse fea, moi fea, emais tendo en conta os posibles arrastres. Dous desprazamentos lonxanos e cero puntos para Xallas e Dumbría, e novamente o pasar das semanas empeza a poñer unha perna enriba difícil de evitar.
E do tope ao baixo, o Monte Louro é o equipo de moda en Terceira Autonómica. Os muradáns venceron en Laxe e xa son a alternativa principal ao título dun Corcubión que non fallou co Castrelo.
Esas sensacións distintas da Preferente e a Primeira Autonómica tamén se palpan en fútbol base, onde o Xuvenil de Liga Gallega do Dumbría deixou ante o Conxo un novo aval para soñar con título, e o Cadete de División de Honra sufriu un excesivo castigo contra o colista Santa Mariña, que deixa a permanencia a nove puntos. Unha categoría máis abaixo da Gallega, a liga de ascenso Xuvenil deixa ao Xallas en solitario na cabeza, despois do sorprendente empate do Cee co Baio.
As táboas de resultados e clasificacións en www.futboldacosta.com. Piquen dende o seu teléfono e pulsen “Engadir a pantalla de inicio”, para ter sempre os resultados no peto.
