O declive do Cayetano, Caietano ou Caetano

Unha mágoa ver como se deixa esmorecer un personaxe creado en 2009 para facer historia do Entroido en Laxe. O grupo municipal está acabando pouco a pouco co enterro do Cayetano, modificando polo camiño a historia creada polo seu día por Xabier García (hoxe esquecido polas corporacións municipais) coa axuda dunha serie de veciñas e veciños da vila, e collendo as partes máis soeces dos mecos veciños.

Porque o Cayetano (si, con y porque se trata dun persoeiro de comezos do século XIX, un fillo bastardo, vividor e bebedor, non recoñecido dos Moscoso chegado dende Castilla, e non Caietano, nin tampouco Caetano, como promocionaba o Concello de Laxe nas súas redes na previa do Entroido noutra desfeita por permitir que a empresa de comunicación use a IA sen control nin respecto) non levaba unha pirola tesa, como lamentaban ver onte as poucas xentes que se achegaron ao funeral e ao enterro do persoeiro. “Un discurso penoso a día de hoxe”, lamentaban algunhas veciñas presentes.

A estas alturas, o Cayetano xa non ten aquel interese que xerou a comezos da década pasada, tendo en conta ademais que previamente non existía un Entroido como tal en Laxe. Ademais, a figura é moito máis cutre que a feita naqueles anos, e a historia peca de caer en símbolos rancios e machistas, no canto de lembrar a loita contra o sistema feudal. Onte apenas a batukada dos Kilomberos, contratados para amenizar a comitiva fúnebre, mantiveron o ambiente algo quente no entroido laxense.

AS CRÓNICAS DO CAIETANO

• 2024: O Enterro do Caietano despediu o Entroido
• 2020: Unha viaxe polos Enterros de Entroido de Bergantiños.
• 2019: O alzamento e a caída do Caietano de Laxe
• 2015: O Caietano protagonizou un entroido reivindicativo no mar de Laxe
• 2011: A historia do Caietano.